Read Изге Язма, 2015 Әюб 15 Bible Online

Әюб 15 - Изге Язма, 2015 bible

Әюб 15

¹Теманлы Әлифаз болай дип җавап бирде:

²«Җил алып килгән сүзләр белән гакыл иясе җавап бирерме, эссе җилләр [14] белән корсагын тутырырмы?!

³Мәгънәсез сүзләр, файдасыз нотыклар белән каршы сөйләп торырмы ул?!

⁴Син хәтта Аллаһыдан курку хисен оныттың, Аның турында уйлануны ваклык дип саныйсың.

⁵Синең гөнаһың телеңне шулай сөйләргә өйрәткән; хәйләкәрләр телен үзләштергәнсең син.

⁶Сине мин түгел, үз авызың хөкем итә, үз телең үзеңә каршы дәлиллек бирә.

⁷Әллә син дөнья йөзенә беренче кеше булып тудыңмы, таулар барлыкка килгәнче үк яратылдыңмы?!

⁸Әллә син Аллаһы киңәшмәсендә утырдыңмы, акылны шунда үзең генә җыйдыңмы?!

⁹Без белмәгән ни-нәрсә мәгълүм сиңа, без аңламаган ни-нәрсәнең асылына төшендең?!

¹⁰Безнең арада чал чәчлеләр дә, картлар да — атаңнан да өлкәнрәкләр бар!

¹¹Әллә сиңа Аллаһы күрсәткән юанычлар, сиңа әйтелгән иркә сүзләр аз булдымы?!

¹²Нигә йөрәгең сине шулай вәсвәсәгә сала, нигә күзләрең ачулы елтырый?

¹³Нигә рухың Аллаһыга каршы юнәлгән, нигә авызыңнан шундый сүзләр чыга?

¹⁴Кеше ничек пакь-саф күңелле булсын, хатын-кыздан туган кеше ничек тәкъва була алсын?

¹⁵Әгәр Аллаһы Үзенең изге затларына да ышанмый, Аның күзендә күкләр дә чиста түгел икән,

¹⁶ялганны су кебек эчә торган, бозык җанлы адәми зат Аның каршында ничек саф була алсын?!

¹⁷Мин сөйләрмен сиңа, ә син тыңлап тор, күргәннәремне сөйләп бирермен,

¹⁸гакыл ияләренең сүзләрен — ата-бабалары яшермәгәнне сөйләрмен.

¹⁹Җир аларга гына бирелгән булган, алар арасында ятларга урын табылмаган.

²⁰Яман кешенең тормышы газап эчендә узар — җәберләүчегә бирелгән гомер еллары санаулы.

²¹Аның колак төбендә дәһшәтле авазлар яңгырап тора, дөньялар тыныч вакытта да аңа җан кыючы килә.

²²Караңгылыктан котыласына ышанмый ул; каршысында һәрчак кылыч көтеп тора.

²³„Кайдан табыйм икән?“ — дип, икмәк эзләп каңгырып йөри, караңгылык көне җитүен сизә ул.

²⁴Авырлык һәм бәла-казалар аны куркуга салалар, яу белән килүче патшадай, аның котын алалар.

²⁵Чөнки ул Аллаһыга кул күтәрде, Кодрәт иясенә каршы баш калкытты,

²⁶кабырчыклы, калын калканын тотып, тәкәбберләнеп Аңа каршы йөгерде.

²⁷Бу яман бәндәнең йөзе симергәнгә, ботларын май басканга,

²⁸таланган шәһәрләрдә, кешеләр ташлап киткән, җимерелергә җиткән йортларда яшәр ул.

²⁹Ул инде бай булмас, мал-мөлкәте тузып бетәр, байлыгы дөнья буйлап җәелеп китә алмас,

³⁰һәм ул караңгылыктан качып котылмас. Аның үсентеләрен ялкын ялмап алыр, Аллаһының сулышы аны себереп ташлар.

³¹Буш өметләргә ымсынып алданмасын: әҗере шул ук бушлык булачак бит!

³²Тиешлесен тулысы белән вакытыннан алда алыр, аның ботаклары яфрагын коеп бетерер;

³³өлгермәгән җимешләрен койган йөзем куагы кебек ул, чәчкәләрен иртә койган зәйтүн агачы кебек,

³⁴чөнки денсезләр өере кысыр булыр, ришвәтченең чатырын ялкын чорнап алыр.

³⁵Бозыклык чәчкәннәр бәла җыяр, аларның йөрәге ялган артыннан ялган тудырыр».