Read Изге Язма, 2015 Әюб 16 Bible Online

Әюб 16 - Изге Язма, 2015 bible

Әюб 16

¹Җавабында Әюб болай диде:

²«Мондый сүзләрне мин күп ишеттем, ниткән юатучылар сез — кайгы гына өстисез!

³Буш сүзләрнең азагы булырмы бер? Миңа каршы сөйләргә нәрсә мәҗбүр итә сезне?

⁴Әгәр сез минем урында булсагыз, мин дә шулай сөйләнер идем, сезгә каршы гаеп артыннан гаеп ташлар, шелтәләп, башымны селкеп торыр идем.

⁵Нотыкларым белән гайрәт биреп, авызымнан юату сүзләре яудырыр идем.

⁶Сөйләсәм дә — җан әрнүе басылмас, тынып калсам да — сүрелмәс.

⁷И Аллам, Син минем бөтен җелегемне суырдың, барча якыннарымны харап итеп бетердең,

⁸тәнемне киптереп корыттың — миңа каршы сөйләүче шаһитлык бу, арыклыгым да — миңа каршы сөйләүче билгедер.

⁹Ачуыннан Аллаһы миңа һөҗүм итә, җәфалый һәм тешләрен шыкырдата; дошманнарым миңа күзләре белән тишәрдәй итеп карыйлар,

¹⁰авызларын ыржайтып, мине мыскыллыйлар, ачуланып, яңакларымны чабаклыйлар; бөтенесе миңа каршы сүз берләшкән.

¹¹Аллаһы мине яманнар иркенә бирде, яманнар кулына ыргытты.

¹²Мин кайгысыз яши идем — Ул минем тормышымны җимерде, муенымнан тотып алды да чәрдәкләп атты, һөҗүм итәр өчен, миңа тамга салды.

¹³Һәр тарафтан минем өскә Аның уклары оча, мәрхәмәтсез рәвештә бөер-бавырларымны үтәли тишә һәм үтемне җиргә агыза.

¹⁴Ул миңа җимерү артыннан җимерү китерә, сугыш чукмары кебек, минем өскә ташлана.

¹⁵Тәнем каплар өчен, тупас тукымадан кайгы киеме тектем, маңгаем белән җиргә кадәр башымны идем;

¹⁶елый-елый битләрем кызарып бетте, күз кабакларымны үлем караңгылыгы каплады.

¹⁷Ә бит минем куллар җәбер-золым белми, догаларым да ихлас күңелдән.

¹⁸И туфрак, сеңдермә минем канымны! Кычкырган тавышым да югалып калмасын!

¹⁹Ләкин күкләрдә хәзер дә минем Шаһитым бар, югарыда минем Яклаучым бар.

²⁰Дусларым мине мәсхәрәлиләр, әмма минем күзләрем Аллаһы каршында яшь коя.

²¹Их, кешеләр арасындагы бәхәсне хөкем итүче адәм булган кебек, Аллаһы белән бәхәсне дә берәрсе шулай хөкем итсен иде!

²²Санаулы еллар үтәр дә китәр — мин кире әйләнеп кайтмаслык юлга китеп барырмын.