Read Изге Язма, 2015 Әюб 19 Bible Online

Әюб 19 - Изге Язма, 2015 bible

Әюб 19

¹Җавабында Әюб болай диде:

²«Кайчанга кадәр сез мине интектерерсез, сүзләрегез белән җәфаларсыз?

³Сез мине ничә тапкырлар мыскылладыгыз — мине мәсхәрәләүдән кыенсынмыйсыз да.

⁴Әгәр мин, чыннан да, ялгышканмын икән, алар минем ялгышлар булып калыр иде.

⁵Әгәр сез, чынлап та, үзегезне миннән өстен куярга, хурлыкка төшүем белән битәрләргә телисез икән,

⁶белеп торыгыз: Аллаһы миңа карата гаделсезлек кылды, минем өскә ятьмәсен ташлады.

⁷„Мине җәберлиләр!“ — дип кычкырам, ләкин җавап бирүче юк, ярдәмгә чакырам, әмма яклаучы юк.

⁸Юлыма киртә куйды Ул — үтеп чыгарлык түгел, караңгылык белән сукмагымны каплады;

⁹Ул миннән абруемны йолкып алды, башымнан таҗымны салдырды;

¹⁰һәрьяклап мине җәфалый — бетәмен! Өметемне агач тамырыдай йолкып алды.

¹¹Мине Үзенең дошманы санап, ачы каһәрен миңа юнәлтте.

¹²Үзләренә юл сала-сала Аның чирүләре бергәләшеп миңа якынлашты, инде чатырым тирәли урнаштылар.

¹³Туганнарымны Ул миннән читләштерде, дусларым да миңа кырын карый,

¹⁴ 14-15 якыннарым, танышларым мине ташлап китте, кайчандыр өемдә сыену тапканнар — онытты. Хезмәтче хатыннар мине килмешәккә саный, алар өчен мин бер чит кешегә әверелдем;

¹⁶хезмәтчемне чакырам — ә ул, кат-кат ялварып сорасам да, җавап бирми.

¹⁷Сулышымның исеннән хатынымның күңеле бизде, ир туганнарым миннән чиркана.

¹⁸Хәтта малай-шалай да мине кимсетә, күренүем була — үчекли башлыйлар.

¹⁹Якын дусларым миннән җирәнә, яраткан кешеләрем йөз чөерә.

²⁰Миннән тире дә сөяк кенә калды, җаным менә-менә очып чыгар кебек.

²¹Кызганыгыз мине, дусларым, кызганыгыз — Аллаһы орды миңа!

²²Нигә сез мине Аллаһы кебек үк эзәрлеклисез, туймагандай, минем тәнемне ашыйсыз?

²³Минем бу сүзләрем язып барылып, кулъязма төргәгенә теркәлеп,

²⁴тимер каләм вә кургаш белән чокып язылса иде дә мәңгелеккә ташка уелып калса иде!

²⁵Мин беләм: мине коткаручы Зат тередер, соңгы көндә җир йөзенә килер Ул.

²⁶Тирем салынып төшеп, менә шул тәнемдә әле мин Аллаһыны күрәчәкмен.

²⁷Мин Аны үз күзләрем белән күрәчәкмен; күрәчәкмен: Ул миңа чит-ят түгел! Күкрәгемдә йөрәгем ничек талпына!

²⁸Ләкин сез: „Ничек без аңа җәбер күрсәтик?! Бу хәлләрнең сәбәпчесе ул үзе бит!“ — диярсез.

²⁹Шулай булгач, кылычтан куркыгыз, чөнки ачу-ярсу кылыч белән җәзалана; шунда сез белерсез: гадел хөкем бар ул!»