Read Изге Язма, 2015 Әюб 21 Bible Online

Әюб 21 - Изге Язма, 2015 bible

Әюб 21

¹Җавабында Әюб болай диде:

²«Сүзләремне игътибар белән тыңлагызчы — ичмасам, шул рәвешле күңелем юансын!

³Мин сөйләп бетергәнче түзеп торыгыз, сүземне тәмамлагач исә — көлсәгез көләрсез.

⁴Әллә мин кешеләрдән зарланаммы?! Әллә түземсезләнүем урынсызмы?!

⁵Менә, мине күреп котыгыз алынсын, учыгыз белән авызыгызны каплагыз.

⁶Шул хакта уйлауга — үзем куркып куям, дер-дер килә башлый бөтен тәнем.

⁷Ник яманнар картайганчы тыныч яши, куәтләре артканнан-арта гына бара?

⁸Аларның балалары һәрчак үзләре белән, оныклары да күз алдында.

⁹Аларның йортына куркыныч янамый, Аллаһының хөкем таягы баш өсләрендә тормый.

¹⁰Аларның үгезләре сыерларны заяга капламый — һәрберсе бозау китерә, бозау салганнары да юк.

¹¹Балаларын, сарык бәрәннәре кебек, чабышып уйнарга чыгаралар, кечек сабыйлары да бииләр, сикерешәләр,

¹²шөлдерле барабан һәм гөсләгә кушылып җырлыйлар, курайга кушылып күңел ачалар.

¹³Алар көннәрен шатлык эчендә үткәрәләр, үлеләр аймагына тыныч иңәләр.

¹⁴Ә бит Аллаһыга болай диләр: „Бездән кит Син, Синең юлларыңны беләсебез килми!

¹⁵Без хезмәт итәрлек Кодрәт иясе кем ул шулкадәр?! Аңа ялварудан безгә ни файда?!“

¹⁶Күрегезче: тормышларының муллыгы үз кулларында дип уйлый алар. Яманнарның бу мәкерле уйлары ерак торсын миннән!

¹⁷Яманнарның шәме еш сүнәме, бәла-каза аларга еш киләме? Ачулы вакытында Аллаһы аларны еш газап чиктерәме?

¹⁸Җилдә тузгыган салам булырга иде аларга яки өермә очырткан кибәк кебек!

¹⁹„Аллаһы бит атасына тиешле җәзаны баласына саклап тора“, — дисез. Ләкин бозыклар белеп торсын өчен, җәзаны Ул аларның үзләренә бирсен,

²⁰һәлакәтләрен үз күзләре белән күрсеннәр, Кодрәт иясенең ачуын эчсеннәр!

²¹Гомер еллары беткәч, үлгәннән соң, гаиләсенә нәрсә буласын уйлыймыни алар?!

²²Аллаһыга — хәтта югарыдагыларны Хөкем итүчегә — акыл өйрәтергә мөмкинме?!

²³ 23-24 Тәне тулып-тулышып торган, сөякләре җелек белән тулган берәү үз көчендә чакта, тынычлыкта һәм уңай-җитеш тормышта үлеп китә.

²⁵Ә башка берәү, җаны әрнеп, яшәү ләззәтен татымый да үлеп китә.

²⁶Аларның икесе дә бер туфракта янәшә ятар, икесен дә кортлар сырып алыр.

²⁷Мин сезнең нәрсә уйлавыгызны, миңа каршы нинди мәкерләр әзерләвегезне беләм.

²⁸Әйтерсез: „Зур түрәнең өе хәзер кайда, яманнар яшәгән чатыр кайда?“

²⁹Ил гизүчеләрдән сораштырганыгыз, аларның күзәтүләренә колак салганыгыз булмадымы:

³⁰явыз бәндә һәлакәт көнендә котылып кала, Раббының ярсулы көне аны читләтеп үтә.

³¹Кем соң аның, күзенә карап, гаебен фаш итәр, кылган эшләре өчен кем җәза бирер?

³²Үлгәч, гәүдәсен зиратка хөрмәтләп озатырлар, каберенә сак куярлар,

³³үзән балчыгы аңа йомшак түшәк булыр, артыннан бар кеше озата килер, алдыннан баручыларның да исәбе-хисабы булмас.

³⁴Йә, нигә кирәк миңа сезнең буш юатуларыгыз?! Сезнең җавапларыгыз — тоташтан ялгандыр!»