Read Изге Язма, 2015 Әюб 22 Bible Online

Әюб 22 - Изге Язма, 2015 bible

Әюб 22

¹Теманлы Әлифаз болай дип җавап бирде:

²«Аллаһыга кеше берәр файда китерә алырмы?! Хәтта иң гакыллысыннан да Аңа ни файда?!

³Синең тәкъва булуың Кодрәт иясенә шатлыкмы?! Синең тормыш юлың саф булудан Аңа ни файда?!

⁴Әллә Ул сине Үзеннән курыккан өчен шелтәли һәм хөкемгә тарта дип уйлыйсыңмы?!

⁵Юк! Димәк, явызлыгың чиксез синең, җинаятьләрең дә бихисап!

⁶Чөнки син кардәшләреңнән бер сәбәпсез рәһен [15] алдың, аларның соңгы киемен салдырдың;

⁷арыганнарга су эчермәдең, ачларга икмәк бирмәдең.

⁸Көчле кеше генә җир били ала, анда дәрәҗәле затлар гына яши, дип санадың син.

⁹Тол хатыннарны буш кул белән борып җибәрдең, үксезләрне таянычсыз калдырдың.

¹⁰Шуңа күрә сине элмәк кыса бара, көтелмәгән бәла котыңны ала.

¹¹Сине караңгылык каплый бара, син һичнәрсә күрмисең, ташкын сулар башыңнан каплап китә.

¹²Аллаһы күкләрдә, югарыда түгелмени?! Башыңны күтәреп кара: йолдызлар ничек биек!

¹³Син исә әйтерсең: „Аллаһы нәрсә белсен?! Куе караңгылык эченнән Ул ничек хөкем итсен?!

¹⁴Болытлар Аңа күрергә комачаулый, күк гөмбәзе тирәли генә йөри Ул“.

¹⁵Син шулай гөнаһкярләр таптаган борынгы юлны сайладыңмы?

¹⁶Нигезен ташкын сулар агызып киткән йорт сыман, дөньялыктан алар вакытыннан алда тартып алындылар.

¹⁷Аллаһыга алар: „Кит яныбыздан! Кодрәт иясе безгә нәрсә эшли алсын соң?!“ — дип әйтә иде.

¹⁸Ә бит аларның йортларын мал-мөлкәт белән Ул тутырган иде. Шулай булгач, яманнарның мәкерләре ерак торсын миннән!

¹⁹Яманнарның һәлакәтен күреп, тәкъвалар сөенерләр, гаепсезләр алардан мәсхәрәләп көләрләр:

²⁰„Дошманнарыбыз юк ителде, мал-мөлкәтләрен ут ялмап йотты“.

²¹Аллаһы белән татулаш, тыныч яшә, шул чагында сиңа мул тормыш килер.

²²Аның авызыннан чыккан үгет-нәсыйхәтне кабул ит, Аның сүзләрен йөрәгеңә сал.

²³Кодрәт иясенә кире кайтсаң, син янә күтәрелерсең. Чатырыңны гаделсезлектән арындырсаң,

²⁴алтыныңны — туфрак белән, Офир алтынын елга чуерташы белән тиң күрсәң,

²⁵шул чагында Кодрәт иясе булыр синең алтының, көмеш хәзинәң дә Ул булыр.

²⁶Шул чагында син Кодрәт иясеннән ләззәт алырсың, йөзеңне Аллаһыга таба күтәрерсең.

²⁷Аңа дога кылырсың да, Ул сине ишетер, һәм син әйткән нәзереңне үтәрсең.

²⁸Теләгән теләкләрең дә кабул булыр, барыр юлларыңа яктылык иңәр.

²⁹Рәнҗетелгән, егылган берәүне күреп: „Күтәрегез аны!“ — диярсең, һәм рухы төшкән ул адәмгә Аллаһы котылу бүләк итәр.

³⁰Аллаһы хәтта гаеплене коткарыр — синең саф-намуслы кулларың аңа котылу алып килер».