Read Изге Язма, 2015 Әюб 23 Bible Online

Әюб 23 - Изге Язма, 2015 bible

Әюб 23

¹Җавабында Әюб болай диде:

²«Аһ-зарларым әүвәлгечә ачы, ыңгырашуымны тыярга тырышам.

³Аллаһыны кайдан табарга икәнлеген, Аның торагына илтүче юлны белсәм икән —

⁴мин Аңа дәгъвамны сөйләп аңлатыр, дәлилләремнең һәммәсен ачып салыр идем.

⁵Шунда Аның нәрсә дип җавап биргәнен ишетер, Аның нәрсә әйткәнен аңлар идем.

⁶Үзенең бөек кодрәтендә минем белән хөкемләшеп торыр идеме Ул?! Юк, минем сүзләремә колак салыр иде Ул!

⁷Шунда Аның белән гадел кеше буларак бәхәсләшә алыр, Хөкемчем тарафыннан мәңгегә акланыр идем.

⁸Ләкин көнчыгышка юнәлсәм — Ул анда юк, көнбатышка таба барсам — анда да очрата алмыйм.

⁹Төньякта берәр нәрсә эшләп йөриме — Аны күрмим, көньякка юнәләме — сизми калам.

¹⁰Ләкин мин тоткан юлны белеп тора Ул, сынаса сынасын — алтын кебек саф калырмын.

¹¹Ул йөргән эзләрдән бардым мин, гел тайпылмыйча Аның юлын тоттым,

¹²Аның авызыннан чыккан боерыклардан тайпылмадым, сүзләрен йөрәгемдә сакладым [16].

¹³Ул Үзе хәл итә икән, кем Аңа каршы килә алыр?! Теләгәнен эшли Ул!

¹⁴Миңа каршы билгеләгәннәрен үтәр Ул — андый уй-ниятләре Аның күптер.

¹⁵Шуңа күрә Аңардан котларым алынып тора, бу хакта уйладым исә — тетрәнеп китәм.

¹⁶Аллаһы җанымны өшетә, Кодрәт иясе куркуга сала мине.

¹⁷Әмма караңгылык та тыя алмас мине, алдымда бар нәрсә караңгыга чумганда да, сүземне әйтми калмам.