Read Изге Язма, 2015 Әюб 24 Bible Online

Әюб 24 - Изге Язма, 2015 bible

Әюб 24

¹Ни өчен Кодрәт иясе үч алу вакытын алдан билгеләми? Ни өчен Аллаһыны белүчеләр Аның шушы көннәрен алдан күрми?

²Кешеләр ызан ташларын күчереп куялар, урлаган малларын җәйләүләрдә йөртәләр.

³Ятимнәрнең ишәген куып алып китәләр, тол хатынның үгезен рәһенгә алып калалар.

⁴Фәкыйрь-юксылны юлдан читкә тибәрәләр, барча ярлы-ябагайны качарга мәҗбүр итәләр.

⁵Фәкыйрьләр, ризык эзләп далада йөргән ишәкләр сыман, көндәлек эшкә чыгалар, һәм кысыр җир аларның үзләрен дә, балаларын да туендыра.

⁶Читләр басуында урак уралар, яманнарның йөзем бакчасында калдык-постык җимешне чүплиләр.

⁷Аларның киеме юк дәрәҗәсендә, яланөс ятып йоклыйлар, салкында ябыныр нәрсәләре юк.

⁸Тауларда яңгыр астында манма су булалар, ышык эзләп, кыяларга сыеналар.

⁹Яман кеше атасыз ятимне ана күкрәгеннән тартып ала, ярлы-ябагайдан бурычы өчен баласын алып кала.

¹⁰Мескен-бичаралар ялангач йөри — кияр киемнәре юк, үзләре көлтә ташысалар да, ачлыктан интегәләр.

¹¹Рәт-рәт булып үскән зәйтүн агачлары арасында май сыгалар, таптап-изеп йөзем суы чыгаралар, ә үзләре сусаудан интегәләр.

¹²Шәһәрдә — үлеп ятучылар ыңгыраша, яралылар ярдәмгә чакыра, ләкин Аллаһы аларның дога-гозерләренә игътибар итми.

¹³Нур яктысына каршы баш калкыткан, яктылык юлын танымаган, шуннан йөрмәгән бәндәләр бар.

¹⁴Фәкыйрь-юксылның җанын кыяр өчен, кеше үтерүче иртә таңнан торып чыга, ә төннәрен ул урлаша.

¹⁵Караңгы төшкәнне көтеп торган уйнашчы: „Мине беркем дә күрми!“ — дип, йөзен каплый.

¹⁶Талаучы төн караңгысында йорт диварын тишә, ә көндезен үз өендә бикләнеп ята; яктының ни икәнен дә белми ул.

¹⁷Дөм караңгылык алар өчен — таң яктысы, зольмәт [17] дәһшәтләре — аларның дустыдыр.

¹⁸Яман бәндә — су өстендәге күбек кенә, биләгән җире каргалган, йөзем бакчасына илтүче юллары буп-буш аның.

¹⁹Корылык һәм эсселек кар суларын алып киткән сыман, гөнаһлыларны да үлеләр аймагы шулай суырып алыр.

²⁰Аларны ана карыны онытыр, алар кортлар өчен азык булыр. Алар турында кабат искә төшермәсләр — хаксызлык, агач кебек, чабып ташланыр.

²¹Бала тапмаган кысыр хатынны җәберли алар, толларга да рәхим-шәфкать күрсәтми.

²²Әмма Аллаһы Үзенең куәте белән көчлеләрне читкә тибәрә; әгәр Ул торып баса икән, беркемнең үз язмышына ышанычы калмый.

²³Кешегә Ул иминлек һәм таяныч бирә, әмма йөргән юлларын гел күзәтеп тора.

²⁴Бер мизгелгә күтәреләләр дә — шундук юкка чыгалар, барча кешеләр кебек, авып, җиргә иңәләр, башак кебек киселеп төшәләр.

²⁵Әллә шулай түгелме? Кем мине ялганда фаш итә һәм сүзләремне кире кага ала?»