Read Изге Язма, 2015 Әюб 29 Bible Online

Әюб 29 - Изге Язма, 2015 bible

Әюб 29

¹Әюб, сүзен дәвам итеп, болай диде:

²«Әгәр элекке заманнарны, Аллаһы мине саклаган көннәрне кире кайтарып булса иде:

³ул чакларда минем юлымны Аның чырагы яктыртып тора, шуның нуры мине караңгыда адаштырмый йөртә иде.

⁴Хәзер дә шул яшьлек көннәремдәге сыман булса иде. Йортымны ул заманда Аллаһы Үзенең канаты астында тота иде,

⁵Кодрәт иясе гел янәшәмдә, балаларым янымда гөрләп тора,

⁶аякларым сөттә коена, кыялардан миңа зәйтүн мае агып тора иде.

⁷Өлкәннәр җыенында үз урыныма утырырга дип шәһәр капкасы янына чыгып килгәндә,

⁸егет-җилкенчәк, мине күрүгә, юл бирә, өлкәннәр, урыннарыннан торып, аягүрә баса иде;

⁹түрәләр сүздән туктый, авызларын учлары белән каплый,

¹⁰дәрәҗәле затлар да, телләре аңкауларына ябышкандай, сөйләү куәтен югалта иде.

¹¹Ул заманда сүзләремне ишетүчеләр мине мактады, эшләремне күрүчеләр хуплады.

¹²Чөнки ярдәм сораган фәкыйрьне, яклаучысыз ятимне мин коткара идем.

¹³Үлем ятагындагылар мине фатихалый иде; тол хатын күңеленә шатлык-сөенеч сала идем мин.

¹⁴Тәкъвалыкны кием итеп кия идем, гаделлек минем өчен өстемдәге япанчам, баш киемем иде.

¹⁵Сукырларга — күз, аяксызларга аяк булдым ул заманда.

¹⁶Фәкыйрьләргә ата булдым, миңа таныш булмаганнарның дәгъвасын тикшердем,

¹⁷ә залимнең [20] ияген төйдем, авызыннан табышын тартып алдым.

¹⁸Мин болай уйлаган идем: „Үз оямда үләрмен, көннәрем ком бөртегедәй хисапсыз булыр,

¹⁹тамырларыма дым-су килеп торыр, ботакларым чык тамчысы белән капланыр,

²⁰дан-шөһрәтем тутыгу белмәс, җәямнең кереше һәрвакыт нык тартылган булыр“.

²¹Мин сөйләгәндә, кешеләр колак салып тыңладылар, киңәшемне көтеп, тын гына тордылар;

²²мин сүздән туктасам, һичкем гәп куертмый иде, минем сүзләр аларның күңелен чык тамчысы кебек сугара иде.

²³Алар мине яңгыр көткән сыман көтеп алалар, язгы яңгыр тамчыларын йоткан кебек, сүзләремне йоталар иде;

²⁴өметен югалтканнарга елмайганда, тегеләр аптырап карап торалар иде — минем ачык йөзем аларны дәртләндереп җибәрә иде.

²⁵Аларга, баш булып, барыр юлларын күрсәтә идем, гаскәр арасында басып торган патшалары кебек, кайгыга батканнарны юатучы кебек идем.