Read Изге Язма, 2015 Әюб 3 Bible Online

Әюб 3 - Изге Язма, 2015 bible

Әюб 3

¹ 1-2 Шуннан Әюб, сүз башлап, дөньяга килгән көненә ләгънәт укыды:

³«Мин туган көн, „ир бала яралды!“ дип әйткән төн кырылып китсен!

⁴Ул көн караңгылыкка әйләнсен, Аллаһы аны күкләрдә искә алмасын, таң яктысы аңа нур чәчмәсен.

⁵Караңгылык, үлем сөреме ялмап алсын аны, кара болыт капласын; кояш тотылу аңа дәһшәт салсын.

⁶Куе караңгылык чорнап алсын ул төнне — ел көннәре исәбендә саналмасын, айлар исәбенә дә кермәсен.

⁷Аһ, ул төн кысыр булсын, сөенеч авазлары ишетелмәсен.

⁸Көннәрне каргый алырдай, Ливьятанны [5] уятырдай көче булган сихерчеләр мин туган көнне ләгънәт укып каргасын.

⁹Ул төнне таң йолдызларын караңгылык капласын; төн, зарыгып көтсә дә, таң нурларын күрә алмасын,

¹⁰чөнки ул төн әнкәм карынын капламады, күзләремне кайгы-хәсрәттән сакламады.

¹¹Никләргә мин үле булып тумаганмын, һәм тугач та, никләр генә үлмәгәнмен?

¹²Нигә мине, тугач, тезләренә алдылар, нигә миңа күкрәк сөте имезделәр?

¹³Хәзер менә үлем йокысы белән йоклар идем, тыныч булыр иде миңа

¹⁴сарайлары җимерелгән патшалар һәм аларның мәслихәтчеләре белән янәшәдә,

¹⁵алтын җыйган, йортларын көмеш белән тутырган түрәләр арасында.

¹⁶Күмәрләр иде мине үле туган бала кебек, якты дөнья күрергә өлгермәгән сабый кебек.

¹⁷Яманнарның ярсулары басыла анда, арып-талчыкканнар анда җаннарына ял ала,

¹⁸тоткыннар да иркен сулап куя анда, ишетелми сакчыларның янаулары аларга.

¹⁹Анда кечек тә, бөек тә тигездер, анда кол да хуҗасыннан азаттыр.

²⁰Ник бирергә газап чигүчегә якты көн?! Җаны кыйналганга яшәү ник кирәк?!

²¹Үлем көтә алар, ләкин үлем күренми, хәзинә эзләгәннән дә тырышыбрак эзли алар үлемне;

²²кабер читенә баскач тантана итә, шатлык-сөенеч кичерә алар.

²³Андый кешенең барыр юлы караңгы, һәр тарафына Аллаһы киртә куя аның.

²⁴Аһ-зарларым бүген — минем икмәгем, газаплы ыңгырашуларым сулар кебек түгелә.

²⁵Ни-нәрсәдән курыксам — шулар төште башыма, ни-нәрсәдән өркенсәм — барысы килде каршыма.

²⁶Тынычлык, ял һәм иминлек юк миңа, гасабилык биләп алды күңелемне».