Read Изге Язма, 2015 Әюб 37 Bible Online

Әюб 37 - Изге Язма, 2015 bible

Әюб 37

¹Шуларны уйласам, йөрәгем күкрәгемнән чыгардай булып тибә башлый.

²Ишетәсезме? Аның дәһшәтле тавышын, авызыннан чыккан гөрелтене ишетәсезме? —

³Бөтен күк гөмбәзен тутырып яңгырый, яшеннәре җир читенә җитә әнә.

⁴Тавышы гөрелди, бөтен куәтенә шартлап ярыла Аның. Яшеннәрен тоткарламый Ул, Үзенең авазын салганда.

⁵Аллаһы Үзенең тавышы белән шаккаттырып гөрелди! Ул безнең өчен акыл ирешмәслек бөек гамәлләр кыла.

⁶Ул боерса, җиргә кар ява, Ул әйтсә, яңгырлар коя.

⁷Кылган гамәлләрен һәркем белеп торсын өчен, Ул әнә шулай кешеләрнең эшләрен туктатып куя,

⁸җәнлекләрне өннәренә кертеп качыра, ояларына куып кертә.

⁹Аның йортыннан өермә чыга, һәм төньяк җиле суыклар китерә.

¹⁰Аллаһы сулышыннан боз хасил була, су өсләре боз белән каплана.

¹¹Болытларны Ул су тамчылары белән туендыра, болытлар эченнән яшеннәрен аттыра;

¹²Аның ихтыяры белән алар тиешле җиргә юнәләләр, бөтен җир тирәли Ул кушканны үтиләр;

¹³җиргә алар йә Аллаһының җәзасын яудыралар, йә рәхим-шәфкатен алып киләләр.

¹⁴Тын кал, Әюб, әйткәннәремә колак сал! Аллаһының хикмәтле эшләре турында уйлап бак!

¹⁵Аллаһының ничек итеп болытлар белән идарә итүен, ничек итеп аларны яшен белән үтәли яктыртуын беләсеңме син?

¹⁶Болытларның нинди кодрәт белән эленеп торуын, белеме камил Затның могҗизаларын аңлыйсыңмы?

¹⁷Көньяк җиленнән җир әлсерәгән чакта, киемеңнән сиңа бөркү була икән,

¹⁸син, Аның кебек, күкләрне нык итеп, койган көзге сыман шомартып элеп куя аласыңмы?!

¹⁹Өйрәт безне: нәрсә әйтик Аңа — томаналыгыбыз комачаулый, әйтер сүз табалмыйбыз!

²⁰Минем нәрсә сөйләргә теләгәнне Аңа берәр кеше әйтерме?! Каушап калган кеше Аның белән сөйләшә алырмы?!

²¹Болытларны җил куып тараткач, кояш нурларына текәлеп карау мөмкин түгел шул.

²²Аллаһы, якты балкышка күмелеп, төньяктан килә, Аның дәһшәтле бөеклеге якынлаша.

²³Кодрәт иясе — безнең өчен акыл ирешмәслек Зат, кодрәте, гаделлеге белән Ул данлыдыр, хаклык иясе буларак, һичкемгә җәбер-золым кылмастыр.

²⁴Шуңа күрә кешеләр Аңардан куркалар, акылы булганнар Аның каршында калтырап торалар».