Read Изге Язма, 2015 Әюб 38 Bible Online

Әюб 38 - Изге Язма, 2015 bible

Әюб 38

¹Шулчак Раббы давыл эченнән Әюбкә болай дип җавап бирде:

²«Мәгънәсез сүзләрең белән Минем уй-ниятләремә кара ягарга кем син?!

³Ир бул, билеңне кысыбрак бу; хәзер Мин сиңа сорау бирәм, ә син җавабыңны әзерлә.

⁴Мин җирнең нигезен салганда, син кайда идең? Әгәр син акыллы, зиһенле икәнсең — әйтеп бир!

⁵Аның чикләрен кем билгеләде дә өстенә үлчәү бавын кем сузды? — Син шуны, шәт, беләсеңдер!

⁶ 6-7 Җирне тотып торучы баганалар нәрсә өстенә утыртылды? Таң йолдызларының бердәм сөенеч җыры һәм Аллаһы угылларының шат авазлары астында җир нигезенең почмак ташын кем салды?

⁸Җир карыныннан бәреп чыккан диңгезнең капкаларын кем ябып куйды?

⁹Диңгезне Мин болытлар белән урадым, караңгылык белән төреп куйдым,

¹⁰аның чикләрен билгеләп, борыс тыгып капкаларын бикләп куйдым,

¹¹әйттем: „Бирегә хәтле җитәрсең дә ары җәелмәссең, шушы урында синең горур дулкыннарың туктап калыр“.

¹² 12-13 Җирне бер читеннән эләктереп алсын да, селкеп, яманнарны коеп төшерсен дип, үз гомереңдә син кайчан да булса да Таңга әмер бирдеңме яисә иртәнге Шәфәкънең урынын билгеләдеңме?!

¹⁴Таң атканда, җирнең йөзе кием җыерчыкларына, мөһер суккан балчыкка охшап китә.

¹⁵Ә яманнар ул яктылыктан мәхрүм була, тәкәббернең сугарга дип күтәрелгән кулы сына.

¹⁶Диңгез башланган җиргә барып җиткәнең, упкын төбендә йөргәнең бармы?!

¹⁷Үлем капкаларының ачылганы булдымы сиңа?! Дөм караңгылык капкасын күргәнең булдымы?!

¹⁸Җирнең киңлекләрен күзәтеп чыга алдыңмы син?! Боларның барысын да белсәң — сөйлә, әйдә, сөйлә!

¹⁹Яктылык туган җиргә кайсы юл илтә, караңгылыкның урыны кайда?

²⁰Син аларның һәркайсын билгеләнгән чиккә кадәр алып бара яисә кайтыр юлны күрсәтә аласыңмы?!

²¹Шулай-шулай, син боларның һәммәсеннән хәбәрдар — яшьтәше бит син аларның! Синең гомерең шулай озын бит!

²²Карлар сакланган урынга кергәнең, боз келәтләрен күргәнең булдымы синең?!

²³Мин аларны шомлы заманнарга, орыш һәм сугыш көненә саклыйм!

²⁴Яктылык нинди юллар буйлап тарала? Көнчыгыштан искән җилләр җир өстенә юлны кайдан таба?

²⁵ 25-27 Кеше аягы басмаган урыннарны, кеше яшәми торган чүлләрне сугару, буш яткан җирләрне дымга туендыру өчен, туфрак астыннан яшел үлән шытып чыга алсын өчен, коеп яуган яңгырларга кем юл сала, дөмбердәтеп килгән күк күкрәвенә кем юл ача?

²⁸Яңгырның атасы бармы? Чык тамчысын кем тудыра?

²⁹ 29-30 Сулар таш кебек катып калганда, һәм тирән диңгезнең өсләре туңганда, боз кем корсагыннан ярала, күктәге бәсләрне кем дөньяга тудыра?

³¹Өлкәр йолдызлыгын бергә җыеп бәйли, Орион йолдызларының билбауларын бушата аласыңмы?!

³²Йолдызлыкларны үз вакытында кабыза аласыңмы?! Җидегән йолдызга, Кечесе белән берлектә, юл күрсәтә аласыңмы?!

³³Күкләрнең кануннарын өйрәндеңме?! Җирдә шул кануннарны урнаштыра аласыңмы?!

³⁴Тавышыңны болытлар ишетерлек итеп яңгырата, ташкын сулар сине күмеп китәрлек итеп яңгыр койдыра аласыңмы?!

³⁵Яшеннәр яшьнәтә аласыңмы?! Алар сиңа: „Без әзер!“ — дип, юлга чыгып китәрләрме?!

³⁶Ибис кошына кем зирәклек биргән дә, әтәчкә кем аңлау сәләте биргән?

³⁷ 37-38 Җир, кибеп, ташка әйләнгәндә, кантарлар укмашып катканда, үзенең гакылы белән кем болытларны санап чыга һәм, күкләрнең савытын чайкалдырып, яңгыр коя ала?

³⁹ 39-40 Ояларында посып яткан, куаклар арасында сагалап торган ана арысланга табышны син тотып бирәсеңме, балаларын син туйдырасыңмы?!

⁴¹Кошчыклары ачлыктан бәргәләнгәндә, Аллаһыга ялварып кычкырганда, каргага азыкны кем табып бирә?