Read Изге Язма, 2015 Әюб 5 Bible Online

Әюб 5 - Изге Язма, 2015 bible

Әюб 5

¹Ярдәмгә чакырып кара, җавап бирүче табылырмы? Изгеләрнең кайсысына мөрәҗәгать итәрсең икән?

²Ахмакны ярсучанлыгы харап итәр, беркатлыны көнчелеге үтерер.

³Мин күрдем ки, аңгыраның тамырлары тирәнәеп өлгерми, көтмәгәндә йортына ләгънәт ябырылып төшә.

⁴Балаларына ярдәмгә килүче булмас, шәһәр капкасы төбендә дәгъвалары юкка чыгар, һәм берәү дә аларны якламас.

⁵Җир уңышын аның ачлар ашар, хәтта тигәнәк арасында үскәнен дә аерып алырлар, ә ачкүзләр аның байлыгын талар.

⁶Бәла җир астыннан үзе шытып чыкмый, кайгы кырда үзе үсми.

⁷Ут чаткысының һавага очуы хак булган кебек, адәм баласының хәсрәт чигәр өчен тууы хактыр.

⁸Әмма синең урыныңда мин булсам, Аллаһыга ялварыр идем, үз эшемне Аллаһыга тапшырыр идем.

⁹Ул кылган гамәлләр бөек, акыл ирешмәслек, могҗизаларының исәп-хисабы юк.

¹⁰Җир йөзенә Ул яңгыр яудырыр, кырларга дым иңдерер;

¹¹кимсетелгәннәрне югары күтәрер, зарлыларны хәвефсез юлга чыгарыр.

¹²Аллаһы хәйләкәрләрнең ниятләрен бозар, һәм аларның кулларыннан уңыш китәр;

¹³Йомры башларның хәйләсен Ул үзләренә каршы кулланыр, һәм мәкерлеләрнең ниятләре юкка чыгар.

¹⁴Аларны көпә-көндез караңгылык чорнап алыр, көн уртасында, төндәге кебек, капшанып кына йөрерләр.

¹⁵Фәкыйрьләрне Аллаһы кылычтай үткен сүзләрдән коткарыр, куәтлеләрнең каты кулыннан азат итәр.

¹⁶Шуңа күрә кимсетелгәннең өмете бар — гаделсезлекнең авызы томаланыр.

¹⁷Аллаһының нәсыйхәтен алганнар бәхетледер! Шуңа күрә Кодрәт иясенең үгетләрен кире какма!

¹⁸Ясаган җәрәхәтен Ул Үзе үк бәйләп куяр; Ул сугар, ләкин Аның кулы савыктырыр да.

¹⁹Ул сине алты бәла-казадан коткарыр, җиденчесенең дә зыяны тимәс сиңа.

²⁰Кытлык килгәндә, Ул сине — ач үлемнән, сугышта кылычтан йолып алыр.

²¹Тел камчысы сиңа үрелеп җитмәс, бөлгенлек килсә дә курыкмассың.

²²Бөлүгә дә, ачлыкка да син көлеп кенә карарсың, ерткыч җанварлар да сиңа куркыныч тоелмас.

²³Басудагы ташлар сиңа комачау итмәс, кыр җәнлекләре белән татулыкта яшәрсең.

²⁴Чатырыңда иминлек булуын белерсең, малларыңны барлаганда, һичнәрсәнең югалмавын күрерсең.

²⁵Нәселеңнең ишлелеген, бала-чагаңның кырда үскән үлән санынча күп булуын күрерсең.

²⁶Үз вакытында җыеп бәйләнгән иген көлтәсе кебек, олы яшькә җиткәч дөнья куярсың.

²⁷Менә нәрсәләр ачыкладык без — шулай, һәммәсе дөрестер! Колак салып тыңла да үзеңә сабак ал».