Read Изге Язма, 2015 Әюб 9 Bible Online

Әюб 9 - Изге Язма, 2015 bible

Әюб 9

¹Җавабында Әюб болай диде:

²«Әйе, сүзләреңнең дөреслеген беләмен. Ләкин кеше Аллаһы каршында ничек аклана ала?

³Әгәр берәрсе Аның белән бәхәскә керергә теләсә, Аның мең соравыннан берсенә дә җавап бирә алмас иде.

⁴Зирәк йөрәкле Ул, көчле, мәһабәт, Аңа каршы торганнарның кайсы исән-имин калыр?!

⁵Тауларны Ул кисәтүсез-нисез урыннарыннан күчереп йөртә, ачуыннан аларны астын өскә китерә.

⁶Җирне Ул үз урыныннан кузгата, аның нигезләрен дер селкетә.

⁷Ул әмер бирсә — Кояш калыкмый, мөһер сугып, йолдызларның яктысын каплый.

⁸Ул берүзе күкләрне җәеп сала, диңгез дулкыннары өстеннән йөгереп уза.

⁹Ул Җидегән, Орион, Өлкәр йолдызлыкларын [10], көньяк күге йолдызларын хасил итте;

¹⁰Аның кылган гамәлләре бөек, зиһен җитмәслек, могҗизаларының исәбе-хисабы юк.

¹¹Ул янымнан үтеп китәр, мин аны күрмәм, узып китәр, ә мин аны шәйләмәм.

¹²Нәрсәңнедер тартып алыр — Аны кем туктата алсын? Кем Аңа: „Син нәрсә эшлисең?“ — дип, каршы әйтә алсын?

¹³Аллаһы Үзенең ачуын тыеп тормас, Аның аяклары астында Раһаб [11] ярдәмчеләре дә сыгылып төшә.

¹⁴Шулай булгач, ничек итеп мин Аңа җавап бирим, Аңа каршы әйтер өчен, кайдан сүзләр табыйм?

¹⁵Гәрчә хаклы булсам да, мин кайтарып сүз әйтә алмас идем, Хөкем итүчемнән бары мәрхәмәт сорар идем.

¹⁶Хәтта чакыруыма җавап бирсә дә, сүзләремне тыңлар диеп ышанмыйм.

¹⁷Өермә күк ябырыла миңа, бер сәбәпсез җәрәхәтләремне ишәйтә;

¹⁸тын алырга ирек бирми, җанымны әрнү белән тутыра.

¹⁹Көч сынашыргамы Аның белән — Ул бит гайрәтле! Хөкемгә тартыргамы — тик Аңа каршы шаһитлыгымны тыңлаучы булырмы?!

²⁰Гаепсез булсам да, үз телем үк мине хөкем итәр, керсез булуыма карамастан, Ул мине, гаепле, дияр.

²¹Минем гаебем юк! Ләкин миңа инде барыбер, мондый тормыш тәмам туйдырды.

²²Минем инде һичнәрсәгә исем китми! Шуңа күрә мин менә болай дим: Ул гаепсезне дә, яманны да бердәй харап итә.

²³Кинәт ябырылган бәла үлем китергәндә, гаепсезләрнең өметсез хәленнән Ул көлә генә.

²⁴Бөтен дөнья яманнар кулына тапшырылган, ә Ул хөкемчеләрнең күзен бәйләп куйган. Аңардан башка бу эшне кем эшли алсын?!

²⁵Көннәрем чапкыннан да тизрәк үтеп китә, чаба гына, әмма алда яхшы нәрсә күренми;

²⁶камыш көймәләр кебек узып китә, табышына атылган бөркет кебек очып үтә.

²⁷Әгәр: „Мин бар зарымны оныттым, караңгы чыраем елмаю белән алышынды“, — дисәм дә,

²⁸барыбер газапларымнан котым алына, чөнки беләм: Син мине гаепсез дип танымаячаксың.

²⁹Мин барыбер гаепле саналырмын — шулай булгач, ник юкка тырышырга?

³⁰Кар сулары белән юынсам да, кулларымны селте белән юсам да,

³¹Син анда да мине пычрак сулы чокырга батырыр идең, миннән хәтта үз киемнәрем дә җирәнер иде.

³²Аллаһы бит минем кебек адәм баласы түгел, ничек мин Аның белән тартыша алыйм, ничек итеп мәхкәмәгә Аның белән дәгъвалашырга барыйм?

³³Безнең арада, җилкәбезгә кулын салып, килештерерлек берәү дә юк.

³⁴Минем өстән җәза таягын алса иде, мине дәһшәткә салудан туктаса иде Ул.

³⁵Шулчак мин, Аңардан курыкмыйча, үз сүземне әйтә алыр идем — әмма мондый шартларда бу эш мөмкин түгел.