Read Изге Язма, 2015 Зәбур 102 Bible Online

Зәбур 102 - Изге Язма, 2015 bible

Зәбур 102

¹Давытның мәдхиясе. [1] Әй күңелем, Раббыга мактау-шөкерләр яудыр! Аның изге исемен данла!

²Әй күңелем, Раббыга мактау-шөкерләр яудыр! Кылган игелекләрен онытма!

³Ул — гөнаһларыңнан ярлыкаучы, бар чир-хасталарыңнан савыктыручы,

⁴сине үлем чокырыннан йолып алучы, мәрхәмәт, рәхим-шәфкать күрсәтүче,

⁵нигъмәтләр белән тәэмин итеп яшәешеңне бөтен итүче, бөркетнеке сыман, яшьлегеңне яңартып торучы.

⁶Раббы барлык мазлум-хәкыйрьләр [93] өстеннән хак вә гадел хөкем йөртә.

⁷Үз юлларын Ул Мусага, эш-гамәлләрен Исраил халкына ачып биргән.

⁸Раббы рәхим-шәфкатьле, миһербанлы, сабыр-түзем һәм чиксез мәрхәмәтле.

⁹Ачуын Ул ахыр чиккә җиткермәс, үч-ярсуларын озакка сузмас.

¹⁰Гөнаһларыбыз өчен безгә ташламалар ясар, гаепләребез өчен җәзаны киметер.

¹¹Чөнки күкләр җирдән никадәр югары булса, Үзеннән куркучы, Үзен хөрмәт итүчегә Раббының мәрхәмәте дә шулкадәр зурдыр.

¹²Көн чыгышы көн батышыннан никадәр ерак булса, гөнаһлы эшләребезне дә Ул бездән шул хәтлегә ераклаштырды.

¹³Ата кеше үз угылларын ничек кызганса, Раббы да Үзеннән куркучыларны шулай кызгана.

¹⁴Чөнки Ул безнең нинди заттан икәнебезне белә, туфрактан яратылганыбызны аңлый.

¹⁵Кеше гомере үләнгә охшаш: кыр үләне кебек чәчәк ата ул,

¹⁶ә өстеннән җил исте исә, юк була, үскән җирендә әсәре дә калмый.

¹⁷Әмма Үзеннән куркучыларга Раббының мәрхәмәте мәңгелектер.

¹⁸Раббы белән төзегән килешүне саклаган һәм Аның әмерләрен үтәп барган һәр буынга Аның игелеге кылыныр.

¹⁹Раббы Үз тәхетен күкләр өстенә куйган, Аның хакимлеге бар нәрсәне иңли.

²⁰Әй сезләр, күкнең фәрештәләре, Раббының ихтыярына буйсынучы, Аның сүзләрен тыңлаучы көч-кодрәт ияләре, Раббыга мактау-шөкерләр яудырыгыз!

²¹Әй сезләр, Раббы хезмәтендәге күк гаскәрләре, Аның ихтыярын гамәлгә ашыручылар, Раббыга мактау-шөкерләр яудырыгыз!

²²Әй сезләр, Раббы бар кылган мәхлуклар, Раббыга мактау-шөкерләр яудырыгыз Ул хакимлек иткән һәр урында! Әй күңелем, Раббыга мактау-шөкерләр яудыр!