Read Изге Язма, 2015 Зәбур 105 Bible Online

Зәбур 105 - Изге Язма, 2015 bible

Зәбур 105

¹Раббыны данлагыз! Раббыга рәхмәтләр укыгыз, чөнки Ул игелекле, һәм Аның мәрхәмәте мәңгелек!

²Раббының кодрәтен кем әйтеп бетерә алыр?! Аны мактау сүзләрен кем ишеттереп бетерер?!

³Бәхетледер гаделлек белән эшләүчеләр, һәрдаим тәкъвалыкта гамәл кылучылар!

⁴И Раббы, халкыңа нурлы йөзең белән борылганда онытма мине, аларны коткарганда, мине дә кайгырт!

⁵Шулчак халкыңа хасланган бәхетне татыр идем, халкың сөенече белән сөенер идем, Синең халкың-биләмәң белән бергә горурлык кичерер идем.

⁶Аталарыбызны кабатлап, гөнаһлар кылдык без, бозыклык юлына бастык, яманлыклар эшләдек.

⁷Мисырда чакта аталарыбыз Синең могҗизаларыңа төшенмәделәр; бихисап игелекле эшләреңне онытып, Камышлы диңгез янында баш калкыттылар.

⁸Әмма Раббы, кодрәтле асылын күрсәтеп, Үз исеме хакына аларны коткарды:

⁹Камышлы диңгезгә боерып, аның суын киптертте, чүл өстедәй коры диңгез төбеннән кешеләрне исән-имин алып чыкты.

¹⁰Дошманнары кулыннан коткарды, нәфрәтлеләр кулыннан йолып алды.

¹¹Ә дошманнарын, диңгез суларын кайтарып, батырып үтерде, берсен дә исән калдырмады.

¹²Исраилиләр шунда Раббының сүзенә ышандылар, Аңа мактауларын юлладылар [104].

¹³Әмма тиздән Аның игелекләрен онытып, киңәшләрен көтмәс булдылар.

¹⁴Чүлдә барганда вәсвәсәгә бирелделәр, Аллаһыны сынарга керештеләр.

¹⁵Ул аларга теләк-эстәгәннәрен бирде, тик көчле үләт тә җибәрде [105].

¹⁶Стан булып торганда Мусага һәм Раббының изге рухание Һарунга көнчелекләре кузгалгач,

¹⁷җир, ярылып, Датанны һәм Абирам тарафдарларын йотты;

¹⁸ут көлтәсе шул төркемнең уртасына төште һәм яман бәндәләрне ялкыны белән көйдерде [106].

¹⁹Хореб [107] тавы төбендә торганда, бер бозау сыны ясады алар, шуңа илаһ итеп табындылар.

²⁰Раббының данын-бөеклеген шулай чирәм белән туена торган бозау сынына алыштырдылар.

²¹ 21-22 Үзләрен Коткаручыны — Мисырда бөек эшләр кылган, Хам илендә [108] могҗизаларын, Камышлы диңгез янында дәһшәтләрен күрсәткән Аллаһыны исләреннән чыгардылар.

²²

²³Шуңа күрә Аллаһы: «Аларны юк итәчәкмен!» — диде. Әмма Муса — Аллаһы сайлаган зат — ике арага кереп баскач, Аллаһының ачуы тыелып калды [109].

²⁴Тансык гүзәл җирне кире какты алар, Аллаһының сүзенә ышанмады;

²⁵Раббы авазына колак салмыйча, чатырларында зар елап сөйләнделәр.

²⁶Шул сәбәпле Раббы кул күтәреп ант эчте — аларны чүлдә чәчеп калдырырга,

²⁷нәсел орлыкларын чит җирләр, чит кавемнәр арасына таратып бетерергә дип күңелен беркетте [110].

²⁸Соңра алар Багал-Пигурга [111] бил бөктеләр, җансыз потка китергән корбаннарын ашап туендылар.

²⁹Кыланмышлары белән Раббы каһәренә тап булып, бөек үләт казасына дучар ителделәр.

³⁰Әмма Пинхәс, торып, арага керде — хөкемен чыгарды, һәм үләттән кырылыш шулай туктап калды.

³¹Аның бу гамәле, тәкъвалык билгесе булып, буыннан-буыннарга мәңгегә теркәлеп калды [112].

³²Алар Мериба суы янында да Раббының ачуын китерделәр, моның Мусага да зыяны тиде:

³³алар аны чыгырыннан чыгардылар, һәм ул, уйламыйча, кирәкмәгән сүзләр сөйләп ташлады [113].

³⁴Раббыдан боерык булса да, исраилиләр чит халыкларны юкка чыгармадылар.

³⁵Үзләре мәҗүсиләр арасында эреп бетеп, бар эшне аларча эшли торган булдылар,

³⁶шуларның потларына табындылар, һәм бу алар өчен тозак булды.

³⁷Угылларын, кызларын җеннәргә корбан итеп китерә башладылар.

³⁸Кәнган потларына корбан итеп, гаепсез угыл һәм кызларының канын агыздылар — җир өстен нәҗесләделәр.

³⁹Эш-гамәлләре белән үзләрен пычраттылар, кыланмышлары белән Раббыга хыянәт иттеләр [114].

⁴⁰Шуннан Раббының аларга ачуы кабарды, Үз халкы-биләмәсе Аны җирәндерә башлады.

⁴¹Һәм Ул аларны мәҗүсиләр кулына, дошманнары хакимлегенә тапшырды.

⁴²Дошманнарның җәбер-золымы астында алар буйсынырга мәҗбүр булдылар.

⁴³Раббы аларны күп тапкырлар коткарды, ләкин алар һаман башбаштаклык күрсәттеләр, гөнаһ эшләр кылып һаман түбән тәгәрәделәр [115].

⁴⁴Шулай да, ялварулы догаларын ишеткәндә, Ул аларның авыр хәлләренә керә,

⁴⁵алар белән төзегән килешүне исенә төшереп, чиксез мәрхәмәтле булганга, аларны кызгана,

⁴⁶исраилиләрне тоткын иткән кешеләр күңелендә рәхим-шәфкать хисләрен уята иде.

⁴⁷Коткар безне, и Раббы Аллабыз! Чит кавемнәр арасыннан җыеп ал! Шунда мөкатдәс исемеңә рәхмәтләр укырбыз, шөһрәтең, даның белән мактанырбыз!

⁴⁸Исраилнең Раббы Алласына мәңге-мәңгегә мактау-шөкерләр яусын! Әйтсен барлык халык: «Амин!» — дисен. Раббыны данлагыз!