Read Изге Язма, 2015 Зәбур 138 Bible Online

Зәбур 138 - Изге Язма, 2015 bible

Зәбур 138

¹Җырчылар җитәкчесенә. Давытның мәдхиясе. [1] И Раббым, Син мине сынап карадың, мине белдең.

²Утырганымны да, торганымны да, уйларымны да ерактан белеп торасың.

³Йөримме мин, ял итәмме — Син гел минем янда, бар юлларым Сиңа билгеле.

⁴Мин әле авыз ачып та өлгермим, ә Син, Раббым, әйтәсе сүземне инде беләсең.

⁵Алдымда да, артымда да — һәр ягымда Син, өстән дә Синең кулың мине саклый.

⁶Хәбәрдарлыгың минем өчен бер могҗизадыр — көчем-аңым җитмәслек биеклектә.

⁷Синең Рухыңнан мин кая китә алыйм?! Хозурыңнан кая кача алыйм?!

⁸Күкләргә күтәрелсәм — Син анда, үлеләр дөньясына төшсәм — анда да Син!

⁹Әгәр мин таң канатларында көнчыгышка очсам йә диңгезнең аръягына — көнбатышка китеп урнашсам,

¹⁰анда да Синең кулың мине озатып йөрер, уң кулың миңа булышлык итәр.

¹¹Әгәр: «Мине караңгылык яшерсен, яктылык төнгә әйләнсен!» — дисәм дә,

¹²караңгылык Синең өчен караңгылык түгелдер, төн Синең өчен көн кебек яктыдыр, караңгылык та, яктылык та бертигездер.

¹³Барча эчке әгъзаларымны Син яраттың, анам карынында җыйнап, миңа кыяфәт бирдең.

¹⁴Сиңа рәхмәт укыйм, чөнки Син мине искитмәле итеп яраттың; эш-гамәлләрең могҗизалы — моны мин яхшы беләм!

¹⁵Җир тирәнлегендә [124] укмашкан чагымда, яшерен рәвештә кыяфәт алганда, минем сөкләрем Синнән яшерен түгел иде,

¹⁶яралгымны Син Үз күзләрең белән күрдең. Минем дөньяда яшисе көннәрем Синең китабыңа мин туганчы ук алдан язып куелган.

¹⁷И Аллаһы, Синең уй-ниятләрең миңа бик тә кадерле! Алар исәпсез-хисапсыздыр:

¹⁸санасаң, ком бөртекләреннән дә ишлерәктер. …Уянган чакта да мин һаман Синең янда!

¹⁹И Аллаһы, яманнарны юк итсәң иде Син! Әй кулы канлы бәндәләр, миннән ерак торыгыз!

²⁰Алар Синең турыда ялган сөйлиләр, явызлык кылып, Сиңа каршы баш күтәрәләр.

²¹Сиңа нәфрәтлеләргә миңамы нәфрәт белән карамаска?! Сиңа каршы баш күтәргәннәрдән миңамы җирәнмәскә?!

²²Үтә бер нәфрәт белән күрәлмыйм мин аларны, кан дошманы булды алар минем өчен.

²³И Аллаһы, сына мине, күңелемдәген танып бел, өйрән мине, уй-ниятләремне ачыкла!

²⁴Тикшереп кара, хәтәр юлда түгелме мин? Мәңгелек юлыңа мине турыла!