Read Изге Язма, 2015 Зәбур 24 Bible Online

Зәбур 24 - Изге Язма, 2015 bible

Зәбур 24

¹Давытның мәдхиясе. [1] И Раббым, җанымны Сиңа тапшырам!

²И Аллам, бар өметем Синдә! Хурлыкка төшермә мине, дошманнарым, минем өстән көлеп, тантана итмәсеннәр.

³Сиңа өмет баглаган һичкем хурлык кичермәсен, сәбәпсез хаинлек [15] итүчеләр үзләре хурлыкка төшсен.

⁴И Раббым, хак юлыңны күрсәт миңа, сукмагыңнан ничек барыйм, төшендер.

⁵Үзеңнең хакыйкать юлыңа күндер, өйрәт мине, чөнки Синдер мине коткаручы Аллаһы, бар өметем һәрчак Синдә генә.

⁶Әзәлдән [16] күрсәтә килгән рәхим-шәфкатеңне, мәрхәмәтеңне исеңә төшерче, Раббым!

⁷Яшьлек гөнаһларым, хаталарымны оныт, игелегең хакына мине мәрхәмәт белән искә ал, Раббым!

⁸Раббы игелекле вә гадәләтледер, гөнаһкярләрне Ул дөрес юл сайларга өйрәтә.

⁹Басынкы күңелләрне туры юлдан җитәкли, Үзенең хак юлларын аларга өйрәтә.

¹⁰Раббы белән төзегән килешүне һәм Аның күрсәтмәләрен тотканнар Аның юлында мәрхәмәт вә тугрылыкка очрар.

¹¹И Раббым, гаебем зур булса да, Үз исемең хакына кичерә күр!

¹²Раббыдан куркып, Аны хөрмәт итүчегә нинди юл сайларга кирәген күрсәтер Ул.

¹³Рәхәттә, муллыкта яшәр шул кеше, нәселе мираска җир алыр.

¹⁴Раббы киңәше — Аңардан курыкканнарга, Аны хөрмәт иткәннәргә; алар белән төзегән килешүнең асылына төшендерә Ул.

¹⁵Күзләрем минем һәрчак Раббыга юнәлгән, аякларымны ау ятьмәсеннән Ул ычкындырыр.

¹⁶Хәлемә күз салып, кызган мине, чөнки ялгыз калып җәфа чигәмен.

¹⁷Йөрәгем сыкравы тулып ташыйдыр, коткар Син мине бу авыр хәлдән.

¹⁸Газаплы, җәфалы хәлемә күз сал да булган бар гөнаһларымны ярлыка минем.

¹⁹Әнә, дошманнарым ничек күбәйгән, миңа нинди аяусыз нәфрәт белән карыйлар.

²⁰Җанымны сакла, коткар мине! Хурлыкка төшермә, чөнки мине сыендыручы Син генәдер.

²¹Пакьлек вә тугрылык мине саклап торсын, чөнки өмет-ышанычым Сиңа юнәлгән.

²²И Аллаһы, коткар Исраилне барлык бәла-казалардан!