Read Изге Язма, 2015 Зәбур 32 Bible Online

Зәбур 32 - Изге Язма, 2015 bible

Зәбур 32

¹Әй тәкъва җаннар, Раббыга сөенечле җырлар җырлагыз! Аны данлау — күңеле саф булганнарның эшедер.

²Гөсләдә уйнап Раббыга рәхмәтләр әйтегез, Аның хөрмәтенә ун кыллы лираны чиртеп уйнагыз!

³Оста уйнагыз, шатлык авазлары яңгыратып, Аңа яңа җыр җырлагыз!

⁴Чөнки Раббының сүзе — хакыйкатьтер, эшләгән эшләре ышанычлыдыр.

⁵Ул хаклык вә гаделлек сөя; Раббының мәрхәмәте бөтен дөньяны иңли.

⁶Күкләр Раббының әмере белән бар булды, күк җисемнәре Аның авызыннан чыккан рухы-сулышы белән яратылды.

⁷Диңгез суларын Ул бер урынга туплады, дәрьяларны тирән упкыннарга урнаштырды.

⁸Раббыдан бөтен җир йөзе курыксын, алдында бар әһле җиһан калтырап торсын!

⁹Чөнки Ул әйттеме — әйткәне бар булды; Ул әмер иттеме — әмере чынга ашты.

¹⁰Раббы халыкларның мәслихәтле эшләрен таркатыр, кавемнәрне морадына ирешмәс итәр.

¹¹Раббының карары мәңге үзгәрмәс, күңелендәге ниятләре — буыннан-буыннаргача.

¹²Раббыны Аллаһы итеп таныган халык — Ул Үзе өчен сайлаган халык бәхетледер!

¹³Раббы, күкләрдән карашын юнәлтеп, адәм балаларының барчасын күрә.

¹⁴Утырган тәхете түреннән җир йөзендәге барча җан ияләрен күзәтә.

¹⁵Ул — һәр кешенең йөрәген бар итүче, аның бар гамәлләрен белеп-аңлап торучы.

¹⁶Гаскәре күплеге генә патшаны коткармас, көч-куәте зурлыгы гына алып-егеткә ярдәм итмәс.

¹⁷Котылу өчен ат — ышанычсыз нәрсәдер: үзенең егәре белән коткара алмас ул.

¹⁸Хактыр, Раббының күзе Үзен хөрмәт иткәннәргә, Үзеннән курыкканнарга, мәрхәмәтенә өмет баглаганнарга юнәлгән —

¹⁹Раббы аларның җанын үлемнән коткара, ачлык килгәндә, аларга ризыгын бирә.

²⁰Безнең җаныбыз Раббыга мохтаҗдыр, Ул безнең ярдәмчебез һәм калканыбыз!

²¹Аңардандыр безнең күңелләргә шатлык-сөенеч иңә, безнең бар өметебез Аның мөкатдәс исеменә баглы.

²²И Раббы, бөтен өметебез Синдә — мәрхәмәтеңнән аерма безне!