Read Изге Язма, 2015 Зәбур 33 Bible Online

Зәбур 33 - Изге Язма, 2015 bible

Зәбур 33

¹Әбумәлик алдында җүләргә салынып, аның хозурыннан куылып китеп барган чакта, Давыт әйткән җыр сүзләре [22].

²Раббыга мактау-шөкерләр яудырырмын һәрвакыт, мактау сүзләре булыр һәрдаим телемдә.

³Бар күңелемнән Раббы белән мактанырмын, мине ишетеп шатлык кичерер мазлумнар.

⁴Раббыны минем белән бергә олуглагыз, Аның исемен дәррәү югары чөйик!

⁵Раббыга ялварып дәшкәндә, Ул мине җавапсыз калдырмады, бар курку-дәһшәтләрдән азат итте.

⁶Раббыга күз төбәгәннәрнең якты булыр күңелләре, оялып кызармас һичкайчан аларның йөзләре.

⁷Ошбу фәкыйрегез дәшеп чакырды, һәм Раббы, ишетеп, бөтен бәлаләреннән аны коткарып калды.

⁸Раббыдан курыккан һәм Аны хөрмәт иткәннәрне Раббының фәрештәсе һәр яктан камап, саклап торыр.

⁹Сынап карагыз да күрегез: никадәр игелекле Раббы! Аңа сыгынган кеше бәхетледер!

¹⁰Әй сез, Раббы Үзе өчен сайлаган бәндәләр, Раббыдан куркыгыз һәм Аны хөрмәт итегез! — Аңардан курыкканнар мохтаҗлык күрмәс.

¹¹Яшь арысланнар ризыксыз, ач булыр, ә Раббыны эзләүчеләр һичнәрсәгә мохтаҗлык кичермәс.

¹²Килегез, әй балалар, мине тыңлагыз: Раббыдан курку һәм Аны хөрмәт итү сабагын өйрәтәм мин сезләргә.

¹³Әгәр кеше, тормышыннан ләззәт табып, гомеренең озын булуын тели икән,

¹⁴тыйсын телен яман сүздән, сакласын авызын ялганнан.

¹⁵Яманлыктан читкә тайпыл, яхшылык кыл, иминлек өчен тырыш, иминлеккә омтыл!

¹⁶Раббының күзе төбәлгәндер тәкъва бәндәсенә, фөрьядын аның колак салып тыңлый Ул.

¹⁷Яманнардан исә Раббы йөз чөерә, аларның хатирәсен үк җир йөзеннән сөрә.

¹⁸Тәкъва бәндәләренең аһ-зарын Ул ишетеп белә, барча бәла-казалардан аларны азат кыла.

¹⁹Күңеле сыныкларга Раббы якындыр, рухы төшкәннәрне Ул коткара.

²⁰Тәкъва адәмнең кайгы-хәсрәте күп була, әмма Раббы аны шуңардан аралый,

²¹бөтен сөякләрен аның имин кыла, һәркайсын сынмастай итә.

²²Яман кешенең явызлыгы үз башына төшәр, тәкъваларны күрәлмаучы бәндә җәзага тартылыр.

²³Үз колларының гомерен саклар Раббы, Үзенә сыенганнарның һичберсен харап итмәс.