Read Изге Язма, 2015 Зәбур 37 Bible Online

Зәбур 37 - Изге Язма, 2015 bible

Зәбур 37

¹Давытның мәдхиясе. Раббы Алла минем хакта онытмасын өчен әйтелгән.

²И Раббым, ачуың чыгып җәзалама мине, ярсыган чагыңда газаплама!

³Укларың тәнемә кадалды, авыр кулың өстемә ятты.

⁴Ачу-ярсуыңнан тәнемдә сау җирем калмады, кылган гөнаһларымнан сөякләремнең саулыгы төкәнде.

⁵Чөнки гөнаһларым башымнан ашкан, авыр йөк булып җилкәмә яткан.

⁶Акылсызлыкларым аркасында тәнемдә яралар исләнеп эренли.

⁷Бөкрәеп калдым, салынды башым, хәсрәт эчендә узадыр көннәрем.

⁸Ут булып яна эчләрем, тәнемдә сау җирем калмады.

⁹Хәлемне җуйдым, тәмам изелдем, йөрәк ачысыннан илерәмен.

¹⁰И Хуҗа-Хаким, бөтен теләк-өметемне Син беләсең, көрсенүләрем Сиңа яшерен түгелдер.

¹¹Йөрәгем дөпелдәп тибә, егәрем тәмам төкәнде, күзләремнән нур качты.

¹²Шеш-кутырларымнан куркып, дусларым качты, күршеләр дә яныма килмәстәй булды.

¹³Җаныма каныкканнар тозак коралар, нияте явызлар миңа яныйлар, миңа каршы көн-төн хәйлә-мәкер уйлап яталар.

¹⁴Ә мин, чукрак кеше кебек, берни ишетмим, телсез кеше кебек, авыз ачып сүз әйтмим.

¹⁵Әнә шулай берни ишетмәгән, авыз ачып әйтер сүзе булмаган телсез-чукрак кешегә әйләндем.

¹⁶Алай да, Раббым, бар өметемне Сиңа баглыйм! И Хуҗа-Хакимем, и Аллам, Син миңа җавап бирерсең!

¹⁷Дога кылдым мин: «Минем өстән көлеп сөенмәсеннәр, абынганымны күреп тәкәбберләнмәсеннәр!» — дидем.

¹⁸Көчкә басып торам, газап-кайгыларым һәрчак күз алдымда.

¹⁹Гаепләремне мин таныйм, икърар итәм, гөнаһларым өчен хәсрәт чигәм.

²⁰Әмма дошманнарым исән, алар көчле, сәбәпсезгә миңа нәфрәт саклаучылар күбәйгәннән-күбәя.

²¹Яхшылыгыма алар явызлык белән җавап бирә, яхшылыкка омтылганым өчен, минем өскә яла яга.

²²Мине ташлый күрмә, и Раббым! И Аллам, миннән ераклашма!

²³Миңа ярдәмгә ашык, и Хуҗа-Хаким, Коткаручым минем!