Read Изге Язма, 2015 Зәбур 38 Bible Online

Зәбур 38 - Изге Язма, 2015 bible

Зәбур 38

¹Музыка җитәкчесе Едутун өчен. Давытның мәдхиясе.

²Үз-үземә сүз бирдем: «Юлымда адымымны сак атлаячакмын, телемне гөнаһтан саклаячакмын, каршымда яман кеше бар чагында, авызыма йозак эләчәкмен!» — дидем.

³Мин шулай телсез калып ләм-мим дәшмәдем, әмма файдасы тимәде — хәсрәтем артты гына.

⁴Эчемдә йөрәгемне ут алды, уйларыма ялкын капты. Шулчак, телем ачылып, әйттем:

⁵«И Раббым, хәбәр бир миңа, әҗәлем кайчан, гомер көннәрем күпме калды, дөньялыкта хәятем кайчангача сузылыр?» — дидем.

⁶Менә, Син миңа берничә карыш гомер үлчәп бирдең, Синең хозурыңда ул бер мизгел кебек. Аягында нык басып торса да, адәм гомере — исеп киткән җил кебектер.

⁷Чынлыкта, кеше тонык бер шәүлә генә, ул бушка тырышыр-тырмашыр, мал җыяр, җыйган малы кемгә каласын белмәсә дә.

⁸Инде, Раббым, миңа нәрсә көтәргә? Минем бар өметем Синдә генә!

⁹Бөтен гөнаһларымны ярлыка минем, акылсыз бәндәләр рисваена дучар итмә!

¹⁰Мин телсез булдым, авыз ачып сүз әйтмәдем, һәм моңа сәбәпче Син идең.

¹¹Йодрыгыңны миннән читкә юнәлт, йодрыгың көченнән мин бетеп барам.

¹²Гөнаһ-языклары өчен җәза биреп, Син шулай кешеләргә сабак укытасың, кадерле әйберләрен көя урынына тапап бетерәсең; чыннан да, һәр адәми затның гомере — исеп киткән җил кебектер.

¹³Догамны ишет, Раббым, аһ-зарыма колак сал, күз яшьләремне җавапсыз калдырма! Чөнки Синең хозурыңда мин бер гарибмен [23], ата-бабаларым кебек вакытлы бер мосафирмын.

¹⁴Читкә ал миннән ачулы йөзеңне: дөньялыкны куеп киткәнче, бәхет татысам иде бер тагын.