Read Изге Язма, 2015 Зәбур 39 Bible Online

Зәбур 39 - Изге Язма, 2015 bible

Зәбур 39

¹Җырчылар җитәкчесенә. Давытның мәдхиясе.

²Бар өметем Раббыда иде, һәм Ул, колак салып, фөрьядымны ишетте.

³Мине үлем чокырыннан, баткаклык эченнән тартып чыгарды; аякларымны каты таш өстенә бастырды, аларга ныклык бирде.

⁴Авызыма яңа бер җыр — Аллабызны данлаучы сүзләр салды. Аның шушы гамәлләрен күреп, күпләр куркуга калыр, ышанычларын Раббыга баглар.

⁵Раббыга өметләнеп торганнар бәхетледер! Андый кеше тәкәббергә, ялганга иярүчегә йөз бирмәячәк.

⁶И Раббы Аллам, күптер Синең могҗизаларың, безнең хакка корган ниятләрең! Сиңа тиңдәш берәү дә юк! Шуларны телгә алып сөйли башласаң, бихисаптыр алар Синдә.

⁷Син миннән корбан, бүләкләр теләмәдең, гөнаһ йолу вә тулаем яндыру корбаны да таләп итмәдең; Син минем колакларымны ачтың.

⁸Шулчак мин әйттем: «Менә, мин килдем, кулъязма төргәгендә минем хакта язылган, — дидем. —

⁹И Аллам, Синең ихтыярыңны үтәргә телим, Синең канун — йөрәгем түрендә».

¹⁰Олуг җыенда мин Синең хаклыгың турында сөйләдем, телемне тыймадым — бу Сиңа мәгълүмдер, и Раббым!

¹¹Хаклыгыңны яшереп тотмадым, тугры-садыйк, Коткаручы булуыңны бәян иттем; мәрхәмәтең вә тугрылыгың хакындагы хәбәрне олуг җыеннан йомып калмадым.

¹²И Раббым, рәхим-шәфкатеңнән мине мәхрүм итмә, мәрхәмәтең вә тугрылыгың мине һаман саклап торсын!

¹³Юкса бихисап бәла-казалар чолгап алды мине, гөнаһ эшләремнән күзләремне пәрдә сарды, башымдагы чәч бөртегеннән дә күбәйде алар, йөрәгемнең хәле бетте.

¹⁴Илтифат күрсәт, и Раббым, коткар мине! Ярдәмең белән ашык, и Раббым!

¹⁵Җаныма кул сузучылар оятка калсыннар, хур булсыннар, миңа зарар-зыян китерергә теләүчеләр, мәсхәрә ителеп, берсе калмый артка чигенсеннәр.

¹⁶Ихи-хи-хи, дип миннән көлүчеләр, рисвай калып, хурлык ачысын татысыннар.

¹⁷Ә Сиңа йөз тотучылар барысы куанышып күңел ачсыннар, «Раббы бөектер!» дип тәкрарласын коткарганың өчен Сине сөючеләр.

¹⁸Мин исә бичара бер фәкыйрьмен — кайгыртсаң иде мине, и Хуҗа-Хаким! Син — миңа Ярдәм итүче, мине Коткаручы! Соңгара күрмә, и Аллам!