Read Изге Язма, 2015 Зәбур 40 Bible Online

Зәбур 40 - Изге Язма, 2015 bible

Зәбур 40

¹Җырчылар җитәкчесенә. Давытның мәдхиясе.

²Юксыл-мескенне кайгыртучы бәхетледер! Казалы көнендә Раббы аны коткарып калыр,

³саклар, яшәтер аны; ил-җирендә бәхетле булыр ул; Раббы аны дошманы иркенә бирмәс,

⁴хасталы чагында аны карап-багар, савыктырып, түшәгеннән күтәрер.

⁵Мин әйттем: «И Раббым, кызган мине, шифа бир, чөнки Синең алда мин гөнаһ кылдым».

⁶Дошманнарым, ачы телләнеп, минем хакта: «Дөмегеп, кайчан исеме онытылыр?» — диләр.

⁷Берәрсе мине күрергә дип килсә, ялган сөйли, күңелендә бозык уйлар җыя, аннан, урамга чыккач, гайбәт таратып йөри.

⁸Миңа нәфрәт саклаучылар һәммәсе, үзара чыш-пыш килеп, миңа каршы мәкер коралар.

⁹«Аның башына бер чир ябышкан, ятагыннан бүтән тора алмас!» — диләр.

¹⁰Икмәгемне бүлешкән ышанычлы дустым да миңа каршы баш күтәрде.

¹¹Әмма Син, Раббым, кызганып, мине аякка бастыр, алардан үчне мин үзем алырмын.

¹²Әгәренки дошманым өстен чыгып тантана итмәсә, шулчак, димәк, миннән разый икәнеңне белермен.

¹³Гаепсез булганыма Син мине сакларсың, һәрчак күз алдыңда тотарсың.

¹⁴Исраилнең Раббы Алласына әзәлдән мәңгелеккәчә мактау-шөкерләр яусын! Амин, амин!