Read Изге Язма, 2015 Зәбур 48 Bible Online

Зәбур 48 - Изге Язма, 2015 bible

Зәбур 48

¹Җырчылар җитәкчесенә. Корах угылларының мәдхиясе.

²Әй халыклар, тыңлагыз! Колак салыгыз, җирдә яшәүчеләр —

³гади кешеләр, асыл затлар, байлар, ярлылар да!

⁴Телемнән хикмәтләр түгеләчәк, күңелдәге уйларым төшенү-аңлау бирәчәк.

⁵Игътибарымны гыйбрәтле хикәяләргә юнәлтермен, гөслә уйнап, аларның серләрен ачармын.

⁶ 6-7 Малларына ышанып яшәгән, байлыклары белән мактанучыларның гөнаһ эшләре мине төрле яктан сырып алганда — шундый афәтле көннәрдә — нигә әле миңа куркып калырга?!

⁸Аллаһыга йолым хакы бирәм дисә дә, адәм баласы үз кардәшен үлемнән йола алмас.

⁹ 9-10 Кеше җанының бәһасе ифрат кыйбаттыр: кабер якасына килеп басмас өчен, мәңге яшәү хокукына ия булыр өчен бирердәй нәрсәсе юк аның.

¹¹Мәгълүмдер һәр кешегә: зирәкләр дә вафат була, шулар кебек үк, наданнар, мәгънәсез кешеләр дә үлә, мал-мөлкәтләре чит кулларга кала.

¹²Җир-суларына үз исемнәрен бирсәләр дә, буыннан-буынга күчеп барган кабер аларның мәңгелек йортына әйләнер.

¹³Бәндә баласы никадәр мактаулы-хөрмәтле булса да, аның гомере дәвамлы түгел, үлемле хайван кебек гүр иясе булачак ул.

¹⁴Ахмакларча үзенә ышанганнарның һәм шулар гамәлен хуплаганнарның язмышы шундыйдыр:

¹⁵сарыклар сыман үлеләр дөньясына олагып, үлем булыр аларның көтүчесе; купшы йортларыннан еракта — үлеләр дөньясында череп бетәр аларның бәдәннәре; ә иртәгесен тәкъвалар алар каберенең туфрагын таптап йөрер.

¹⁶Мине исә Аллаһы саклап калыр, җанымны үлем кулыннан коткарыр.

¹⁷Берәве баеганнан-байый икән, баесын, өенең малы арта икән, арта бирсен — андыйларга син кызыкма:

¹⁸гүренә ул үзе белән һичнәрсә ала алмас, җыйган малы да артыннан ияреп бармас.

¹⁹Исән чакта гәрчә үзен бәхетле санаса да, уңышлары өчен кешеләрдән хуплау сүзе ишетсә дә,

²⁰ул барыбер яктылыктан мәңге мәхрүм ата-бабалары янына күчәчәк.

²¹Бай булып та аңы җитмәүче кеше үлемле хайван кебек гүр иясе булачак.