Read Изге Язма, 2015 Зәбур 50 Bible Online

Зәбур 50 - Изге Язма, 2015 bible

Зәбур 50

¹ 1-2 Җырчылар җитәкчесенә. Давытның мәдхиясе. Батшеба белән булганнан соң Давыт янына Натан пәйгамбәрнең килүенә нисбәтле мәдхия [32].

³И Аллаһы, кызган мине! Олуг мәрхәмәтең, чиксез рәхим-шәфкатең хакына минем бозык эшләремне сызып ташла.

⁴Юып төшер миннән гаепләремне, гөнаһларымнан арындыр, пакьлә мине.

⁵Бозык эшләремне мин ачык беләм, гөнаһларым һәрвакыт күз алдымда.

⁶Синең алда, фәкать Синең алда гөнаһлы мин, Синең алда явызлык кылдым. Гаепләү сүзләрең хаклыдыр, хөкемеңдә Син гаделдер.

⁷Хактыр: бу дөньяга мин гаепле булып туганмын, ана карынында ук гөнаһлы булганмын.

⁸Менә, бәндәләр күңелендәге хакыйкатьне сөюче Син; кальбемә минем зирәклек орлыгы салчы.

⁹Һүссөп суларын бөрке — һәм мин чистарырмын, коендыр мине — кардан ак булырмын.

¹⁰Шат, сөенечле авазлар ишеттер, Син зыян китергән сөякләрем янә рәхәт тойсын.

¹¹Йөзеңне читкә бор гөнаһларымнан, гаепләремне сызып ташла.

¹²И Аллаһы, мине саф йөрәкле кыл, какшамас яңа рух хасил ит күңелемдә.

¹³Хозурыңнан мине читкә тибәрмә, изге Рухыңнан мәхрүм итмә.

¹⁴Коткарып сөендер мине кабат, күндәмлек рухын уят үземдә.

¹⁵Шуннан бозыкларга юлыңны өйрәтермен, һәм гөнаһлылар Сиңа борылыр.

¹⁶Коткар мине кан түкмәле гөнаһтан, и Аллаһы, коткаручы Аллаһы! Һәм телем шунда хаклыгыңа дан җырлар!

¹⁷И Раббым! Авызымны ачык кыл, телем Сиңа мактау сүзләре юлласын.

¹⁸Теләсәң, мин Сиңа корбан китерер идем, тик Син аны теләмисең, тулаем яндыру корбаннарыннан һушланмыйсың.

¹⁹Аллаһы кабул итә торган корбан — түбәнчелекле рухтыр. Түбәнчелекле, күндәм йөрәкләрне Син кире какмассың, и Аллаһы!

²⁰Миһербаның белән Сионга игелек кыл, Иерусалим каласының диварларын торгыз!

²¹Шулчакны Син тиешле корбаннардан — тулаем яндыру вә яндыру корбаннарыннан разый булырсың; шулчакны корбан итеп мәзбәхеңә үгезләр китерерләр.