Read Изге Язма, 2015 Зәбур 58 Bible Online

Зәбур 58 - Изге Язма, 2015 bible

Зәбур 58

¹Җырчылар җитәкчесенә: «Харап итмә» көенә. Давытның шигыре. Шаул, Давытны үтермәкче булып, аның йортын күзәтер өчен кешеләр җибәргән вакытка мөнәсәбәтле [44].

²И Аллам, коткар мине дошманнарымнан, миңа каршы аякланучылардан азат ит!

³Явызлык кылучылардан коткар мине, канга сусаучылар кулыннан йолып ал!

⁴Юкса күр, Раббым: залим бәндәләр мине сагалый, үтерергә ниятләп, миңа каршы фетнә оештыра, гәрчә җинаять вә гөнаһ кылмасам да;

⁵гаебем булмаса да, һөҗүм итәргә ашкына алар. Кузгал, миңа ярдәмеңне юлла, хәлемне күр!

⁶Әй Күкләр Хуҗасы Раббы Алла, әй Исраил Алласы, уян! Халыкларның барчасын җәзага тарт! Явыз хыянәтчеләрнең берсен дә аяма!

⁷Кичләрен алар әйләнеп кайтып, этләр кебек, шәһәр буйлап улашып йөриләр.

⁸Күр, нинди генә сүзләр ургылмый авызларыннан, телләре үткен кылыч кебек, «Кем ишетә безне?!» — дип уйлый алар.

⁹Әмма Син, Раббы, алардан көләчәксең әле, мәсхәрәгә калдырачаксың әле халыкларны!

¹⁰Көч-куәтем — Синдер, Сиңа сыгынамын, чөнки Аллаһы — минем ныгытмам!

¹¹Мәрхәмәт кылучы Аллаһы миңа ярдәмгә килер, дошманымның җиңелүен миңа Үзе күрсәтер.

¹²Бу сабак халкым хәтереннән җуелмасын өчен, дошманнарны капыл үтермә. Син аларны кодрәтең белән таратып туздыр, күтәреп ор, и Хуҗа, и калканыбыз!

¹³Аларның телләрендә гөнаһлы сүзләр, шуңа күрә тәкәбберлекләре алар өчен тозакка әйләнсен! Ләгънәт-каргышлары, сөйләгән ялганнары өчен,

¹⁴Син аларны дәһшәтең белән кырып ташла — дөньяда эзләре калмаслык булсын! Шунда җир читенәчә хәбәр таралыр: Ягъкуб нәселе белән Аллаһы Үзе идарә итә.

¹⁵Кичләрен алар әйләнеп кайтып, этләр кебек, шәһәр буйлап улашып йөриләр.

¹⁶Ашар өчен азык эзлиләр, туймасалар, шыңшырга тотыналар.

¹⁷Мин исә кодрәтеңә җыр җырлармын! Иртә таңда сөенә-сөенә мәрхәмәтеңне данлармын! Син бит минем ныгытмам, афәт килгәндә, сыену урыным булдың.

¹⁸Кодрәтем чыганагы — Синдер! Сиңа мәдхияләр җырлыймын! Аллаһы — минем ныгытмам, мәрхәмәт кылучы Аллаһы Ул!