Read Изге Язма, 2015 Зәбур 64 Bible Online

Зәбур 64 - Изге Язма, 2015 bible

Зәбур 64

¹Җырчылар җитәкчесенә. Давытның җыр-мәдхиясе.

²И Аллаһы, Сион тавында яңгыраган мактау сүзләре — Сиңадыр; әйткән нәзерләребез Синең алда үтәлсен!

³Син — дога сүзләрен ишетүчедер! Бар кеше Синең каршыңа килер.

⁴Гөнаһ эшләрем хәттин ашты, әмма Синдер безнең гөнаһларны ярлыкаучы.

⁵Бәхетледер фәкать шул кеше, кайсын Син, сайлап, Үз хозурыңа якынайтасың — ишегалларыңда яшәтәсең. Йортыңның — мөкатдәс ханәңнең игелекләрен безгә насыйп итсәң иде.

⁶И Аллаһы, безнең Коткаручыбыз! Дәһшәтле эшләрең белән Син безгә җавап бирәсең — коткарасың безне. Җир йөзенең төрле почмагында, ерак диңгез артларында яшәүчеләрнең бар өмете фәкать Синдәдер.

⁷Көч-кодрәтең белән билеңне буып, Син тауларны үрә торгыздың.

⁸Диңгезләр гөрелтесен, дулкыннар шавын, халыклар фетнәсен бастыручы — Син ул!

⁹Дөньяның кырый-чикләрендә яшәүчеләр Синең илаһи галәмәтләреңне күреп курку кичерер, көнчыгыш тарафтан көнбатышкача халыклар Сиңа сөенечле җырларын җырлар.

¹⁰Син, җирне кайгыртып, аның сусавын басасың, бәрәкәтен арттырасың — Аллаһының дәрьясы суга мулдыр; игеннәрне үстерергә җирне әзерләп куясың:

¹¹буразна араларына су агызасың, туфракның кантарларын тигезлисең, яңгыр сулары белән җирне йомшартып, үсентеләргә фатихаңны бирәсең.

¹²Елны шулай бай уңыш белән төгәллисең: эзең төшкән һәр җирдә муллык ташып тора,

¹³сахрадагы көтүлекләр яшеллеккә күмелә, калкулыклар сөенечкә төренә,

¹⁴утлап йөргән терлек белән болыннар чуарлана, үзәннәр иген белән каплана — тирә-якта бөтен нәрсә тантана итә, җыр суза.