Read Изге Язма, 2015 Зәбур 67 Bible Online

Зәбур 67 - Изге Язма, 2015 bible

Зәбур 67

¹Җырчылар җитәкчесенә. Давытның җыр-мәдхиясе.

²Калыксын Аллаһы, таралсын дошманнары, Аңа нәфрәтлеләр качсын хозурыннан!

³Томан таралган кебек таралсын һәммәсе! Ут каршында эреп аккан балавыз кебек, Аллаһы карашыннан эреп юк булсын яман бәндәләр!

⁴Ә тәкъвалар куаныч тапсыннар, сөенү шатлыгы татысыннар Аллаһы алдында, куанышып күңел ачсыннар!

⁵Аллаһыга дан җырлагыз, исеменә мәдхияләр көйләгез, болытлар өстендә гизүчене олуглагыз! Раббы Аның исеме — тантана итегез Аның каршында!

⁶Аллаһы — үксезләрнең атасы, тол хатыннарның яклаучысы. Ул Үзенең изге ханәсендә утыра.

⁷Аллаһы ялгызакларны йорт-гаиләле итә, тоткыннарны арындырып иреккә чыгара, ә гыйсъянчылар [48] эссе чүлдә кала бирә.

⁸И Аллаһы, Үз халкыңны әйдәп барганда, чүл аркылы чыкканыңда,

⁹Синең алда, и Синай Алласы, и Исраил Алласы, җир йөзе тетрәнеп чайкалды, күкләрдән җиргә сулар түгелде.

¹⁰Үз биләмәңә Син мул яңгырлар яудырдың, кысыр калган чагында аңа көч-дәрман өстәдең, и Аллаһы;

¹¹халкың шунда төпләнеп-җирләште. Фәкыйрьләргә Син, и Аллаһы, шулай игелек күрсәттең.

¹²Хуҗа-Хаким боерык бирде, һәм хатын-кыз җәмәгате йөгереп сөенче таратты:

¹³«Дошман гаскәрләре кача, патшалары белән бергә кача! Хатыннар үз йортларында ганимәт [49] малы бүлә:

¹⁴көмеш канатлы, алтын каурыйлы күгәрчен сыннары бүлешәләр. Сугыш барган көнне ни өчен кайберләрегез утардагы сарыклыр янында калды?»

¹⁵Күкләр Хуҗасы патшаларны куганда, Салмон тавына кар яуды.

¹⁶Әй мәһабәт тау — Башан тавы, өркәч-өркәч таулы Башан!

¹⁷Нигә әле син, әй күп түбәле тау, Аллаһы тавына, Ул яшәгән тауга көнләшеп карыйсың? Хактыр: Раббы шунда мәңге яшәячәк!

¹⁸Аллаһының сугыш арбалары меңләптер, меңнәрчә меңнәр белән санала алар. Хуҗа-Хаким Синай тавыннан Үзенең изге ханәсенә килеп урнашты.

¹⁹И Раббы Алла, Син, әсирләрне ияртеп, биеклеккә күтәрелдең, хәтта Сиңа каршы булганнардан бүләк-һәдияләр кабул иттең.

²⁰Мактау-шөкерләр яусын Хуҗа-Хакимгә! Ул һәркөнне безнең авырлыкларны күтәрә, Аллаһы — безнең Коткаручыбыз!

²¹Безнең Аллабыз — котылу алып килүче Аллаһы! Үлемнән котылу бары Хуҗа-Раббы ихтыярындадыр.

²²Аллаһы Үз дошманнарының башына җитәчәк, гөнаһ юлында йөргәннәрнең түбә чәчен йолкып ташлаячак.

²³Раббы: «Дошманнарны Башаннан кире кайтарачакмын, диңгез төпләреннән тартып чыгарачакмын!

²⁴Аягыңны шулар канына батырырсың, этләреңә дошман канын ялатырсың», — диде.

²⁵И Аллам, и патшам! Һәркемнең күз алдындадыр Синең, Аллаһы, изге ханәгә тантаналы аяк басуың:

²⁶алдан — җырчылар, арттан — кыллы уен коралларында уйнаучылар, уртада шөлдерле барабан каккан яшь кызлар атлады.

²⁷Әй сезләр, Исраил нәселе варислары, җәмәгать җыеннарында Раббы Аллага мактау-шөкерләр яудырыгыз!

²⁸Әнә, алдан иң кече Беньямин ыругы атлый, артыннан — күп санлы Яһүдә илбашлары, шулай ук Зәбулун вә Нәптали илбашлары бара.

²⁹Аллаһы сезләрне көч-гайрәт белән өлешләгән. Үз көчеңне, и Аллаһы, элеккечә безгә гамәлдә күрсәт!

³⁰Иерусалимдәге йортыңны хөрмәтләп, патшалар Сиңа бүләк-һәдияләр китерер.

³¹Камышлык ерткычын — Мисырны, үгезләре белән бергә бозауларны — чит халыкларны тез чүктер! Ясак түләтергә теләүчеләрне изеп тапта, сугышырга ашкынган халыкларны куып тарат!

³²Мисырдан бүләкләр күтәреп илчеләр килер, хәбәшиләр, и Аллаһы, Сиңа һәдияләр китерергә ашыгыр.

³³Әй җир йөзенең патшалыклары, Аллаһыга дан җырлагыз, Хуҗа-Хакимгә мәдхияләр җырлагыз!

³⁴Ул, борынгы күкләр киңлеген гизеп, әнә Үзенең көр тавышын яңгырата.

³⁵Аллаһының көч-кодрәтен игълан итегез! Аның галилеге Исраил өстендәдер, көч-кодрәте болытлар өстендә!

³⁶И Аллаһы, мөкатдәс урыныңда дәһшәтледер Син! Исраил Алласы Үз халкына көч-куәт биреп тора. Аллаһыга мактау-шөкерләр яусын!