Read Изге Язма, 2015 Зәбур 68 Bible Online

Зәбур 68 - Изге Язма, 2015 bible

Зәбур 68

¹Җырчылар җитәкчесенә: «Лалә гөле» көенә. Давытның мәдхиясе.

²И Аллаһы, коткар мине! Сулар муеныма хәтле җитте.

³Мин тирән сазлыкка кереп баттым, аягыма басар җир юк. Тирән суларга юлыктым, агымы бөтереп алып китә.

⁴Ялвару-инәлүләремнән хәлем төкәнде, тамагым корып кипте; Аллаһының килүен көтеп, күзләремнең нуры сүнде.

⁵Нахактан миңа ачу тотучылар башымдагы чәч бөртегеннән дә күбәйде; сәбәпсезгә эзәрлекләүче дошманнарым чиктән ашты, мин алмаганны алар миннән таләп итәләр.

⁶И Аллаһы, минем акылсыз эшләремне Син беләсең, гөнаһларым Синнән яшерен түгел.

⁷И Хаким, и Күкләр Хуҗасы Раббы, Сиңа өмет баглаучылар минем аркада оятка калмасын! И Исраил Алласы, Сиңа йөз тотканнар хурлык кичермәсен!

⁸Чөнки мин, Синең хакыңны яклаганга, хәкарәтләр [50] күрәм, шулардан йөземне хурлык каплады.

⁹Кардәшләрем, үз анамның угыллары өчен мин чит-ят бер кешегә әверелдем.

¹⁰Чөнки йортың өчен җан атып көям мин, Сине хурлаучыларның хурлау ачысын үз өстемә алам.

¹¹Башымны кече итеп ураза тотсам, бу да миңа гаеп санала.

¹²Таза киемемне салып, тупас тукымага төренсәм, көлкегә күтәрәләр.

¹³Капка мәйданына җыелышып утыручылар барысы минем хакта гайбәт чәйни, шәраб эчүчеләр, такмаклар әйтеп, мине хурлый.

¹⁴Әмма минем догам бары Сиңа, и Раббым! Мәгъкуль чагыңда, и Аллам, чиксез мәрхәмәтең белән миңа җавап бир, тугрылыгыңны күрсәтеп коткар мине!

¹⁵Мине баткаклыктан тартып чыгар, батып һәлак булуыма юл куйма! Нәфрәтле бәндәләрдән, тирән сулардан мине котылдыр, саклап кал!

¹⁶Ургылып аккан сулар мине алып китмәсен, төпсез упкын, үзенә суырып алып, башымнан капламасын!

¹⁷Җавап бир миңа, Раббым, чөнки мәрхәмәтең чиксездер. Олуг рәхим-шәфкатең белән миңа таба борыл!

¹⁸Колыңнан йөзеңне яшермә, чөнки хафада мин. Тизрәк җавабыңны бир!

¹⁹Якынай миңа, җанымны азат ит, дошманнарым коткысыннан йолып ал!

²⁰Мине ничек хурлауларын, мине ничек мәсхәрә итүләрен Син беләсең — миңа каныгучылар барысы да күз алдыңда.

²¹Хәкарәтләр йөрәгемә күп җәрәхәт салды, хәлем тәмам төкәнде. Хәлемә керүчене көттем — булмады, юатучыны эзләдем — табылмады.

²²Ризык урынына миңа агу ашаттылар, сусаганда, серкә эчерттеләр.

²³Аш табыны алар өчен ау ятьмәсе, дуслары өчен тозак булсын!

²⁴Күзләре караңгыланып, күрмәс булсыннар, гомер буена бөкрәеп калсыннар!

²⁵Ярсу-дәһшәт яңгырыңны өсләренә яудыр, каһәрең ялкыны аларны көйдерсен!

²⁶Торакларын шәрәләндер аларның, чатырларында терек җан калмасын!

²⁷Чөнки Синнән инде бер җәза алган кешеләрне алар һаман эзәрлекли бирәләр, Син яра ясаганнарга тагын да яра өстиләр.

²⁸Кылган гөнаһларын җыя бар, акланырлык нәрсә табылмасын үзләренә!

²⁹Тормыш китабыннан сызып ташла исемнәрен, тәкъвалар белән янәшә теркәлеп йөрмәсеннәр!

³⁰Мин исә бер фәкыйрьмен, җәфа чигәмен! И Аллаһы, коткарып, саклап кал мине!

³¹Исемен телгә алып, Аллаһыга җырлар багышлармын, рәхмәтләр укып, бөеклеген данлармын.

³²Корбанлык үгездән, мөгезле-тояклы бозаудан артыграк һушландырыр Раббыны бу.

³³Мазлумнар моны күреп куанырлар. Әй Аллаһыга йөз тотканнар, күңелегезгә дәрт керсен!

³⁴Чөнки Раббы фәкыйрьләрнең догасын ишетә, тоткын халкын күз уңыннан төшерми.

³⁵Әй җир вә күкләр, диңгезләр вә андагы барлык җан ияләре, Аллаһыны данлагыз!

³⁶Чөнки Аллаһы Сионны азат итәчәк, Яһүдә калаларын яңадан торгызачак. Халык, шунда төпләнеп, илнең варислы хуҗаларына әвереләчәк.

³⁷Аллаһы колларының балалары әлеге җирне үзенә биләмәгә алачак, Аллаһы исемен сөйгәннәр шунда яшәячәк.