Read Изге Язма, 2015 Зәбур 76 Bible Online

Зәбур 76 - Изге Язма, 2015 bible

Зәбур 76

¹Җырчылар җитәкчесе Едутун өчен. Асафның мәдхиясе.

²Инәлү авазымны мин Аллаһыга юнәлтәмен, мине ишетсен дип, Аңа ялварып дәшәмен.

³Кайгылы көндә мин Хуҗа-Хакимне эзлим, җаныма юаныч таба алмыйча, кулымны күккә сузып, төннәр уздырам.

⁴Рухым зәгыйфьләнгәндә, ыңгырашып, Аллаһыны искә алам, Аның хакында уйланам.

⁵Син миңа күз йомарга ирек бирмисең, җан газабыннан сүз әйтергә телем бәйләнә.

⁶Узып киткән ерак еллар, борынгы заманнар турында уйланам.

⁷Төнге җырларымны искә төшерәм, үз-үзем белән сөйләшәм, күңелемдәге сорауларга җавап эзлим:

⁸«Хуҗа-Хаким безне бөтенләйгә ташлап киттеме? Якты йөзен безгә бүтән ачмасмы?

⁹Мәрхәмәтен башка күрсәтергә теләмәсме? Вәгъдәләрен инде тормышка ашырмасмы?

¹⁰Миһербанлыгын оныттымы? Рәхим-шәфкатен ачудан йомып калдымы?»

¹¹Шуннан соң мин эчемнән әйттем: «Аллаһы Тәгалә инде уң кулын элеккечә эшкә җикми, минем өчен бу — иң зур хәсрәт», — дидем.

¹²Мин Раббының эш-гамәлләрен истән чыгармам. Әйе, борынгыда эшләгән могҗизаларыңны хәтердә саклармын,

¹³Синең барлык эшләреңне аңларга тырышырмын, бөек гамәлләрең турында уйланырмын!

¹⁴И Аллаһы, юлың изгедер! Аллаһыдай бөек тагын нинди илаһ бар?!

¹⁵Могҗизалар тудырган, халыклар арасында кодрәтен таныткан Аллаһы Син!

¹⁶Син көчле беләгең белән Үз халкыңны — Ягъкуб вә Йосыф угылларын коткардың.

¹⁷Сине күргәч, и Аллаһы, су дәрьялары шөбһәләнеп чайкалды; Сине күргәч, диңгез төпләре кайнап ташыды.

¹⁸Болытлар үзенең суларын бушатты, күкләр гөмбер-гөмбер күкрәде, төрле тарафка Синең утлы укларың очты.

¹⁹Күк эче гөрелтең белән тулды, яшеннәр галәмне балкытты, җир өсте калтырап тетрәнде.

²⁰Синең юлың диңгез аша узды, тирән суларны ерып үтте — эзләрең күренмәслек иде.

²¹Халкыңны Син Муса вә Һарун куллары белән көтү кебек алга әйдәп бардың.