Read Изге Язма, 2015 Зәбур 87 Bible Online

Зәбур 87 - Изге Язма, 2015 bible

Зәбур 87

¹Корах угылларының җыр-мәдхиясе. Җырчылар җитәкчесенә: «Махалат леаннот [81]» көенә. Эзрах нәселеннән булган Һеманның нәсыйхәте.

²И Раббым, коткаручы Аллам, кич-көндез Сиңа инәлеп дәшәм.

³Догам Синең хозурыңа ирешсә иде, колак салса идең минем инәлүләремә.

⁴Чөнки җанымдагы кайгы-хәсрәт тулып ашты, көннәрем үлеләр аймагына якынлашты.

⁵Үлем чокырына иңүчеләргә иш булдым, көч-дәрманнан яздым;

⁶үлеләр арасына ташланган, кабердә яткан мәетләр күк булдым, Синең тарафтан инде онытылган, мәрхәмәтле кулыңнан читкә тибәрелгән хәлдә калдым.

⁷Син мине тирән чокыр төбенә, кара упкын эченә аттың.

⁸Ачу-дәһшәтең минем өскә авыр йөк булып ятты, каһәрең дулкыннары мине аяктан бәреп екты.

⁹Таныш-белешләремне Син миннән ераклаштырдың, алар күзендә мине җирәнгеч итеп күрсәттең; камалуда мин, котылу юлым юк.

¹⁰Кайгы-хәсрәттән күзләрем зәгыйфьләнде. Һәркөн Сиңа ялварамын, Раббым, кулларымны Сиңа таба сузамын.

¹¹Могҗизаларны үлеләр өчен эшләрсеңме Син?! Үлеләр, терелеп, Сиңа рәхмәтләр укырмы?!

¹²Мәрхәмәтең — кабердә, тугрылыгың черекләр арасында телгә алынырмы?!

¹³Караңгыда Синең могҗизаларыңны кем күрер?! Онытылу дигән җирдә Синең хаклыгыңны кем белер?!

¹⁴Мин исә, Раббым, ярдәмгә чакырам Сине; иртә таңда догам хозурыңа барып ирешер.

¹⁵Ник Син, Раббым, мине читкә тибәрәсең? Йөзеңне ник миннән яшерәсең?

¹⁶Яшь чагымнан үлем, кайгы көтә мине; Синең дәһшәтеңнән гаҗизмен.

¹⁷Ачу-каһәрең басып-изеп узды, дәһшәтеңнән рухым тәмам сынды.

¹⁸Туфан эчендәге кебек, мине һәр яктан Синең дәһшәтең чорнап алган.

¹⁹Дусларымны, якыннарымны миннән читләштердең, янәшәмдә калган сердәшем тик зольмәттер [82].