Read Изге Язма, 2015 Зәбур 90 Bible Online

Зәбур 90 - Изге Язма, 2015 bible

Зәбур 90

¹Аллаһы Тәгалә яклавындагы кеше кодрәтле Затның ышыгында урын табар.

²Раббыга әйтер ул: «Сыену урыным, кальгам-ныгытмам, өмет баглаган Аллам — Синдер».

³Раббы сине аучы тозагыннан да, үләт зәхмәтеннән дә коткарыр;

⁴сине канатлары астына алып каплар, шунда сыенып хәвефсез яшәрсең. Аның тугрылыгы синең өчен калкан, кальга дивары булыр.

⁵ 5-6 Төнлә ябырылып килгән дәһшәт тә, көн яктысында очкан уклар да, караңгыга төренеп йөри торган үләт зәхмәте дә, көндезен кырган мур да куркыта алмас сине.

⁷Янәшәңдә — мең кеше, уң тарафыңда ун мең кеше кырылып ятса да, сиңа үлем янамас.

⁸Яман бәндәләрдән үч алынуын син читтән торып тамаша кылырсың.

⁹Сыену урыным — Раббыда! Ышыклыгың Аллаһы Тәгаләдә булганга,

¹⁰синең башыңа явызлыклар төшмәячәк, чатырыңа афәтләр якынлашмаячак.

¹¹Чөнки һәр йөргән юлыңда сине сакларга дип, Үзенең фәрештәләренә Ул боерык биргән.

¹²Юл ташына абынып егылмассың: фәрештәләр сине кулларына күтәреп алыр.

¹³Син арыслан вә зәһәр еланнар өстенә басып үтәрсең, яшь арыслан вә аждаһаларны таптап изәрсең.

¹⁴«Мине сөйгән затны Мин коткарырмын, исемемне күңелдә йөрткәне өчен, аның яклаучысы булырмын, — дияр Раббы. —

¹⁵Ул мине дәшеп чакырыр, һәм Мин аңа җавап бирермен, кайгылы чагында янында булырмын, коткарып, аны данга күмәрмен;

¹⁶гомерен озын кылып, коткару бүләк итәрмен!» — дияр.