Read Изге Язма, 2015 Зәбур 93 Bible Online

Зәбур 93 - Изге Язма, 2015 bible

Зәбур 93

¹И Раббы, үч алучы Аллаһы, Үзеңне күрсәт, үч алучы Аллаһы!

²Калык, җир йөзенең Хөкемчесе, тәкәбберләргә хак җәзаңны бир!

³Яманнар кайчангача, и Раббы, яманнар кайчангача тантана итәр икән?

⁴Аларның авызыннан һавалы сүзләр бөркелә, бозыклык эшләгән һәркем мактала.

⁵И Раббы, халкыңны җәбер кыла, Син сайлаган халыкны кыерсыта алар.

⁶Толны, читтән килгәнне бугазлыйлар, үксезләрнең җанын кыялар.

⁷Алар: «Раббы күрми, Ягъкуб Алласы берни дә белми», — дип уйлый.

⁸Әй ахмаклар, акылыгызга килегез! Әй наданнар, кайчан акыл керер икән сезгә?

⁹Колакны бар иткән ишетмәс дисезме?! Күзне яраткан күрмәс дисезме?!

¹⁰Халыкларны җәзага тартучы, кешегә акыл өйрәтүче сезне фаш итмәс дисезме?!

¹¹Раббы адәм баласының ниятләрен белә, алар буш, мәгънәсездер.

¹²Бәхетледер, и Раббы, Синнән акыл өйрәнгән, кануның кагыйдәләрен үзләштергән кеше!

¹³Син аны афәтле көндә дә саклап яшәтәсең, яманнарга чокыр казылганчы, аны имин кыласың.

¹⁴ 14-15 Чөнки Раббы Үз халкын читкә какмаячак, Үзенең милкен ташлап китмәячәк. Хөкем эшләре гадел кылыначак, һәм саф күңеллеләр моңа терәк булачак.

¹⁶Явызлар алдында мине кем яклар? Бозыклар белән көрәштә янәшәмдә кем торыр?

¹⁷Раббым хәлемә кереп ярдәм итмәсә, җаным күптән тынлык иленә күчәр иде.

¹⁸«Менә-менә аягым тайпылыр!» дигән чакларда Синең мәрхәмәтең, Раббым, мине егылудан саклап калды.

¹⁹Кайгы-хәсрәттән эчем тулып ташыса, Син юатып, күңелем сөенеч белән тула.

²⁰Кануннар чыгарып золым кылучы явыз хөкемдарлар Сиңа якын булырмы?!

²¹Андыйлар тәкъва кешенең җанына бөтен өерләре белән ташланалар, гаепсезне үлемгә хөкем итәләр.

²²Әмма Раббы — минем Кальгам-ныгытмам, Аллаһы — мин сыену тапкан Кыяташтыр!

²³Раббы Аллабыз ул бозык бәндәләргә эшләренә бәрабәр җәзасын бирер, кылган явызлыклары өчен кырып ташлар.