Read Изге Язма, 2015 Гыйбрәтле сүзләр 1 Bible Online

Гыйбрәтле сүзләр 1 - Изге Язма, 2015 bible

Гыйбрәтле сүзләр 1

¹Исраил хөкемдары Давыт углы Сөләйман патшаның гыйбрәтле сүзләре

²зирәклек һәм нәсыйхәтнең асылын танып белергә, акыл көченең хикмәтле мәгънәләрен аңларга;

³акыллы гамәл-хәрәкәтләрнең, тәкъвалык, гаделлек, намуслылыкның кагыйдәләрен үзләштерергә;

⁴гади кешегә — тапкыр булырга, яшь кешегә гыйлемдә һәм эш-гамәлдә үзенең сәләтен үстерергә ярдәм итәр.

⁵Зирәк кеше, боларны тыңлап, белемен киңәйтер, аңлы кеше акыллы гамәлләр табар

⁶һәм дә бу гыйбрәтле вә хикмәтле сүзләрнең, зирәк затлар әйткән бу тәгъбирләрнең серләренә төшенер.

⁷Гыйлемнең башы — Раббыдан курку һәм Аны хөрмәт итү; зирәклекне һәм киңәш-нәсыйхәтне фәкать ахмаклар гына хәкарәт итә [1].

⁸Углым! Атаң нәсыйхәтен тыңла, анаң үгетен кире какма;

⁹чөнки алар синең башыңа кидерелгән гүзәл таҗ һәм муеныңа тагылган нәфис бизәктер.

¹⁰Углым! Гөнаһлылар сине үз якларына аударырга тырышсалар риза булма;

¹¹әгәр алар сиңа әйтсәләр: «Әйдә безнең белән, аулак җирдә тозак корып, гаепсезләрне сагалап торыйк,

¹²аларны теге дөньяга олактыргандай, тере килеш кабергә күмгәндәй, җаннарын кыйыйк та,

¹³һәртөрле мал-мөлкәтләрен алып, өйләребезне тутырыйк,

¹⁴шунда уртак малдан үзеңә дә өлеш чыгар», — дисәләр, аларга иярмә, сүзләрен тыңлама.

¹⁵Углым! Сак бул, алар белән бер юлга чыкма, алар сукмагына аяк басма;

¹⁶чөнки аларның аяклары явызлыкка таба чаба, кан коярга ашыга.

¹⁷Кошларның үз күзләре алдында аларны эләктерер өчен тозак кору — мәгънәсезлек;

¹⁸гөнаһлылар куйган тозак та бары аларның үз каннары коелуга, үз җаннары кыелуга гына китерәчәк.

¹⁹Чит кеше малына кызыккан һәркемнең юлы әнә шулай тәмамлана: комсызлыгы аны һәлак итә.

²⁰Зирәклек ул үзен урам чатларында белдерә, аның авазы мәйданнарда яңгырый.

²¹Сүзләрен ул халык җыелган урыннарда, шәһәр капкалары алдында бәян итә:

²²— Әй томана бәндәләр, кайчанга кадәр шулай беркатлы булып калырсыз?! Әй акылсызлар, кайчанга кадәр шулай ахмаклыктан тәм табарсыз?! Әй наданнар, кайчанга кадәр гыйлемне дошман итәрсез?!

²³Гыйбрәт итеп тыңлагыз: уемдагын сезнең өскә яудырам, сүзләремне сезгә җиткерәм.

²⁴Мин өндәдем, ә сез тыңламадыгыз; сезгә кулымны суздым, сез игътибар итмәдегез.

²⁵Сез минем барлык мәслихәтләремне кире кактыгыз, шелтә сүзләремә колак салмадыгыз.

²⁶26-27 Шуңа күрә мин дә сезнең һәлакәтле язмышыгызга көлеп карармын; давыл кебек куркынычлы афәт, өермә кебек хәтәр бәла-каза өстегезгә ябырылганда, сезне кайгы һәм кысынкылык чолгап алганда, мин дә шатланып көләрмен.

²⁸Менә шул чакта мине чакырырлар, ә мин ишетмәм; мине эзләрләр, ләкин тапмаслар.

²⁹Чөнки алар гыйлемне хәкарәт иттеләр һәм үзләренә Раббыдан курку һәм Аны хөрмәт итү юлын сайламадылар;

³⁰минем киңәшемне кабул итмәделәр, искәртүләремә колак салмадылар;

³¹менә шуның өчен алар үзләре сайлаган юллары һәм ниятләренең ачы җимешен татырлар.

³²Чөнки томаналарның дуамал кирелеге, акылсызларның ваемсызлыгы аларның үзләрен һәлакәткә илтәчәк.

³³Ә инде мине тыңлаучы, явызлыклардан курыкмыйча, хәвефсез һәм имин яшәячәк.