Read Изге Язма, 2015 Гыйбрәтле сүзләр 10 Bible Online

Гыйбрәтле сүзләр 10 - Изге Язма, 2015 bible

Гыйбрәтле сүзләр 10

¹Сөләйман патшаның гыйбрәтле сүзләре. Зирәк угыл атасын шатландырыр, ә акылсыз угыл анасын кайгы-хәсрәткә батырыр.

²Нахак юл белән табылган хәзинә файда китермәс, тәкъвалык исә үлемнән коткарыр.

³Раббы тәкъва бәндәсенең җанына ачыгырга юл куймас, яманның комсызлыгын исә кире кагар.

⁴Ялкау куллар кешене фәкыйрь итәр, ә тырыш куллар баетыр.

⁵Җәен үз вакытында ашлыгын урып-җыйган угыл акыллыдыр, ә урак өстендә вакытын йоклап уздырган угыл хурлык китерер.

⁶Тәкъва кешенең күңелендә мәрхәмәт булыр, яманның теле исә золым белән туеныр.

⁷Тәкъва кешенең истәлеге мөбарәк булыр, ә яманның исеме тиз онытылыр.

⁸Зирәк кеше үгетне кабул итәр, ә ахмак телле абынып егылыр.

⁹Туры юлдагы кеше хәвефсез йөрер, ә кыек юлдагы тозакка эләгер.

¹⁰Күз кысып ишарәләүче кеше бәлагә салыр, ә ахмак телле абынып егылыр.

¹¹Тәкъва кешенең теле — тормыш чишмәсе, ә яманның теле золым белән туеныр.

¹²Нәфрәт хисе гауга тудырыр, әмма мәхәббәт хисе барлык гөнаһларны каплар.

¹³Акыл иясенең авызыннан хикмәт чыгар, ә акылсызның сыртына чыбык төшәр.

¹⁴Зирәкләр белем туплар, ә акылсыз кеше үзенең теле белән һәлакәтен якынайтыр.

¹⁵Байның милке — куәтле шәһәрдер, ярлының бәласе — фәкыйрьлектер.

¹⁶Тәкъва кешенең әҗере — тормышка юл, ә яманның табышы — җәзадыр.

¹⁷Нәсыйхәткә тугры кеше тормыш бирүче юлдадыр, ә нәсыйхәтне кире кагучы адашып йөрер.

¹⁸Нәфрәтен яшергәннең теле дә ялган сөйләр, ялган таратучы исә ахмак булыр.

¹⁹Күп сөйләү гөнаһка китерер, ә телен тыйган акыллы булыр.

²⁰Тәкъва кешенең сүзләре саф көмеш кебек, ә яманның күңеле буп-буш.

²¹Тәкъва кешенең теле күпләрне тукландыра, ә ахмак кеше акыл азлыгыннан харап була.

²²Раббының фатихасы кешене баета һәм кайгы-хәсрәттән коткара.

²³Ахмак кеше өчен җинаять эшләү күңел ачу кебек, ә акыллы кешенең сөенече — зирәклектер.

²⁴Яман кешенең курыкканы үз башына килер, ә тәкъва кешенең теләге үтәлми калмас.

²⁵Яман кеше үзе чыгарган өермәдән юк булыр, ә тәкъва кешенең нигезе мәңгелек.

²⁶Теш өчен — серкә, күз өчен төтен ничек булса, йомышы төшкән кеше өчен ялкау да шундый.

²⁷Раббыдан курку һәм Аны хөрмәт итү гомерне озайтыр, ә яман кешеләрнең гомер еллары кыскара барыр.

²⁸Тәкъва кешеләрнең өмете — шатлык, ә яман кешеләрнең өмете акланмас.

²⁹Раббының юлы — намуслы кеше өчен сыену урыны, ә явызлык кылучылар өчен — һәлакәт.

³⁰Тәкъва кеше гомер-гомергә тотрыклы яшәр, ә яман кеше иленнән куылыр.

³¹Тәкъва кешенең авызыннан хикмәт чыгар, ә яманның теле чабып өзелер.

³²Тәкъва кешенең телендә — ягымлы-хуш сүзләр, ә яманнарның телендә әдәпсез сүзләр булыр.