Read Изге Язма, 2015 Гыйбрәтле сүзләр 11 Bible Online

Гыйбрәтле сүзләр 11 - Изге Язма, 2015 bible

Гыйбрәтле сүзләр 11

¹Алдый торган үлчәү — Раббы каршында кабахәтлек; Раббыга үлчәүнең гадел булганы хуш.

²Тәкәббергә ияреп, хурлыгы да килеп җитәр, әмма тыйнакларга ияреп, зирәклек килер.

³Гадел кешенең күңел сафлыгы аңа туры юл күрсәтер, ә мәкерле кешенең хәйләсе аның үзен һәлак итәр.

⁴Хисап көнендә байлык ярдәм итә алмас, тәкъвалык исә үлемнән коткарыр.

⁵Гаепсез кешене тәкъвалыгы туры юлдан алып барыр, ә яманнар үзләренең яманлыгыннан һәлак булыр.

⁶Гадел кешене тәкъвалыгы коткарыр, ә яманнар үзләренең явыз ниятләре аркасында тозакка эләгер.

⁷Яманның үлеме белән бергә аның өметләре дә юкка чыгар, бозык кешенең өметләре җимерелер.

⁸Тәкъва кеше бәла-казадан котылып калыр, ә аның урынына бәла-казага явыз кеше эләгер.

⁹Монафикъ кеше үзенең мәкерле теле белән якынын һәлак итәр, әмма тәкъва кешеләр зирәклекләре аркасында бәладән котылып калырлар.

¹⁰Тәкъва кешеләр унышка ирешкәндә, шәһәр шатлыкка күмелер; явызлар һәлак булганда, тантана итәр.

¹¹Гаделләрнең бәрәкәтле фатихасы шәһәрне югары күтәрер, ә явызларның мәкерле теле аны җимереп ташлар.

¹²Акылы сай кеше үзенең якынын хурлап тәм табар, акыллы кеше исә дәшми калыр.

¹³Сүз йөртүче кеше серне ачар, ышанычлы кеше исә серне саклый белер.

¹⁴Үгетсез халык бөлгенлеккә төшәр, ә үгетчеләре күп халык имин яшәр.

¹⁵Чит-ят кеше өчен үз өстенә җаваплылык алучы бәлагә тарыр, ә бу йөкне үз өстенә алудан баш тарткан кеше хәвефсез яшәр.

¹⁶Ачык йөзле хатын — хөрмәт, ә тырыш кеше байлык казаныр.

¹⁷Миһербанлы кеше үз-үзенә игелек итәр, ә миһербансыз кеше үз-үзенә зыян китерер.

¹⁸Яман кешенең бар эше өметсез чыгар, ә тәкъвалык орлыгы чәчүченең әҗере ышанычлы булыр.

¹⁹Тәкъвалык кешене тормыш юлына кертә, ә явызлык эстәүче үзенең үлемен якынайта.

²⁰Күңеле мәкерлеләр Раббы каршында җирәнгеч саналыр, әмма гөнаһсыз юлдагыларны Раббы якын күрә.

²¹Хакыйкать ки, яманнар җәзасыз калмас, тәкъва кешеләр исә коткарылыр.

²²Җилбәзәк хатынның гүзәллеге — дуңгыз борынындагы алтын боҗра белән бер үк.

²³Тәкъва кешеләрнең эстәгәне — фәкать игелек, яманнарны көткән нәрсә — газап.

²⁴Берәү юмарт була, шулай да аның байлыгы арта бара; икенче берәү бик саран булса да, фәкыйрьлектән котыла алмый.

²⁵Юмарт җанлы бай булыр; бүтәннәргә ярдәм иткәннең үзенә дә әҗер чыгар.

²⁶Кыйммәт бәһа өмет итеп, ашлыгын сатмыйча торучыны халык каргар, ә ашлыгын вакытында сатканны мактар.

²⁷Кем игелек эсти, ул илтифат табар, ә кем яманлык эзли, эзләгәне башына килер.

²⁸Байлыкка гына өмет итүче егылыр, ә тәкъва кеше җәйге яфрак кебек яшәрер.

²⁹Үз өенең иминлеген туздыручы әҗергә җил алыр; ахмак кеше зирәк акыллыга кол булыр.

³⁰Тәкъва кешенең җимеше — тереклек агачы; зирәклек саф җаннарны үзенә җәлеп итәр.

³¹Тәкъва кеше дөньялыкта ук бүләкләнер, ә яман бәндә һәм гөнаһкяр, һичшиксез, җәзасын алыр.