Read Изге Язма, 2015 Гыйбрәтле сүзләр 12 Bible Online

Гыйбрәтле сүзләр 12 - Изге Язма, 2015 bible

Гыйбрәтле сүзләр 12

¹Нәсыйхәтне үз күрүче белемне дә яратыр, ә шелтә сүзен күрәлмаучы — томанадыр.

²Игелекле кешедән Раббы разый булыр, ә мәкерле кешене хөкем итәр.

³Явыз гамәлләре белән кеше иминлек казана алмый, тәкъва кешеләрнең исә нигез тамырлары нык булыр.

⁴Игелекле хатын — ире өчен таҗ, яманаты чыккан хатын исә иренең сөякләрендәге черек кебек.

⁵Тәкъва кешенең уй-теләге — гаделлек, ә явызларның үгете — мәкер.

⁶Явызларның сүзләре — кан кою өчен тозак, ә гаделләрнең сүзе яманлыктан коткара.

⁷Явызлар гөнаһларына батып дөмегерләр, ә тәкъваларның өе имин торыр.

⁸Акылы зирәк булганны мактарлар, ә бозык уйлы бәндә нәфрәткә дучар булыр.

⁹Бер телем икмәккә мохтаҗ булып та, үзен затлы итеп күрсәтергә тырышучы тәкәббердән үзе эшләп ризык табучы гади кеше күпкә яхшырак.

¹⁰Тәкъва кеше үзенең мал-туары турында да кайгыртып яшәр, явызның күңеле исә рәхимсез.

¹¹Үзенең җирен эшкәртүче икмәккә туяр, ә эшләмичә көн күрүчеләргә ияргәннең акылы сайдыр.

¹²Яман кеше намуслыларны явыз гамәлләр ятьмәсенә эләктерергә теләр; әмма тәкъваларның нигез тамырлары нык.

¹³Явыз кеше үз сүзенең тозагына эләгер, ә тәкъва кеше бәладән котылыр.

¹⁴Кеше үз сүзенең җимешләре белән игелеккә ирешә; һәм бүләге дә кешегә хезмәтенә карап бирелә.

¹⁵Ахмак кеше үзенең юлын туры дип уйлар; ә акыллы кеше үгет-киңәшкә колак салыр.

¹⁶Ахмак кешенең ачуы тиз кабыныр, ә акыллы кеше хәкарәт ителүен яшерә белер.

¹⁷Хакыйкать сөйләүченең сүзләре гадел; ялган сөйләүченең шаһитлыгы да ялган.

¹⁸Әдәпсезнең сүзләре кеше җанын үткен кылычтай телгәли, ә акыллы кешенең сүзләре йөрәккә дәва булып ята.

¹⁹Хак сүзнең гомере — мәңгелек, ә ялган сүзнең гомере — күз ачып йомганчы гына.

²⁰Усал ниятле кешеләр йөрәгендә — мәкер, ә татулык яклы кешеләр йөрәгендә сөенеч-шатлык булыр.

²¹Тәкъва кешегә һичнинди явызлык килмәс, яман кешенең күңеле исә золым-әшәкелек белән тулган.

²²Ялган сөйләү — Раббы алдында җирәнгечтер, ә хакыйкать сөйләүчене Раббы үз күрә.

²³Зирәк кеше үзенең белгәнен яшереп саклый, ә акылсыз кеше үзенең ахмаклыгын теленә күчерә.

²⁴Тырыш кеше хакимлек итәр, ә ялкау кеше кол булыр.

²⁵Йөрәктәге сагыш кешенең рухын төшерә, ә ягымлы сүз аның күңелен ача.

²⁶Тәкъва кеше үзенең якынына дөрес юл күрсәтер, ә яманнар күрсәткән юл адаштырыр.

²⁷Ялкауга кош итен кыздырып ашау да насыйп түгелдер, ә тырыш кеше зур байлыкка ия булыр.

²⁸Тәкъвалыкның юлы — тормышка илтүче юлдыр; тормыш юлында үлем юк.