Read Изге Язма, 2015 Гыйбрәтле сүзләр 13 Bible Online

Гыйбрәтле сүзләр 13 - Изге Язма, 2015 bible

Гыйбрәтле сүзләр 13

¹Акыллы угыл үз атасының үгет-нәсыйхәтен тыңлар, ә җәнҗаллы угыл шелтә сүзенә колак салмас.

²Кеше үзе әйткән яхшы сүзләрдән игелек күрер, ә Канун бозучы үзенең җанында бары явызлык тояр.

³Телен тыйган җанын саклар, ә авызын ерып күп лыгырдаучы үзен бәла-казага дучар итәр.

⁴Ялкауның җаны нәрсә генә эстәсә дә, теләгенә ирешмәс, ә тырыш кешенең җаны тук булыр.

⁵Тәкъва кеше ялганны дошман күрә, ә яман кеше үзен хур һәм рисвай итә.

⁶Гаепсез кешене тәкъвалык саклар, ә намуссызны кылган гөнаһлары һәлак итәр.

⁷Кайбер кеше, һичнәрсәсе булмаса да, бай булып кылана; икенче берәү, байлыгы зур булса да, үзен ярлы итеп күрсәтә.

⁸Бай кеше байлыгы белән үзенең тормышын саклап калыр, ә фәкыйрь кешегә һичнәрсә янамас.

⁹Тәкъваларның уты якты янар, ә яманнарның шәме пыскып сүнәр.

¹⁰Тәкәббер кешедән фетнә чыгар, ә киңәш-табыш итүчеләр акыл җыяр.

¹¹Хәрәм юл белән табылган мал тиз бетәр, ә хезмәт белән табылганы арта барыр.

¹²Гамәлгә озак ашмаган өмет йөрәкне әрнетер, ә чынга ашканы тереклек агачыдай булыр.

¹³Гыйбрәтле сүзне санга сукмаучы үзенә зыян китерер, ә үгет-нәсыйхәткә колак салучы тиешле әҗерен күрер.

¹⁴Зирәк акыл иясенең өйрәтүләре — үлем тозагыннан саклый торган тереклек чишмәседер.

¹⁵Аек акыл кеше күңеленә хуш килер, явызларның юлы исә һәлакәткә илтер.

¹⁶Аңлы кеше белемгә таянып эш итәр, ә аңсыз кеше ахмаклыгын күрсәтер.

¹⁷Начар илче бәлагә эләгер, ышанычлы илче иминлек китерер.

¹⁸Нәсыйхәтне кире кагучы фәкыйрьлеккә һәм мәсхәрәгә дучар булыр, ә мәслихәтне тотучы хөрмәт казаныр.

¹⁹Гамәлгә ашкан теләк җанны җылыта; ахмаклар өчен иң газаплысы — яманлыктан аерылу.

²⁰Зирәкләр белән аралашучы үзе дә зирәк булыр, ә ахмаклар белән дуслык йөртүче юлдан язар.

²¹Гөнаһлылар бәла-казага калыр, ә тәкъва кешеләр бәрәкәт табар.

²²Яхшы кеше оныкларына да мирас калдыра, ә гөнаһлының байлыгы тәкъва кешеләр файдасына булыр.

²³Фәкыйрьләр басуында да ашлык мул игелә, әмма гаделсезлекләр аркасында алардан да кайберәүләр һәлак була.

²⁴Ата кеше үз углын чыбыкларга кызгана икән, димәк, ул аны яратмый; ә кем үз углын ярата, ул аны чыбыклап үстерә.

²⁵Тәкъва кеше туйганчы ашар, ә яманның карыны ач калыр.