Read Изге Язма, 2015 Гыйбрәтле сүзләр 14 Bible Online

Гыйбрәтле сүзләр 14 - Изге Язма, 2015 bible

Гыйбрәтле сүзләр 14

¹Акыллы хатын үзенең өен җыеп тотар, ә акылсыз хатын аны үз куллары белән җимерер.

²Туры юлдан йөрүче кеше Раббысына хөрмәт күрсәтә, ә юлы бозык кеше Аны санга да сукмый.

³Ахмакның телендә тәкәбберлек казасы булыр, зирәкләр исә телләре белән үз-үзләрен сакларлар.

⁴Үгезләр юк җирдә утлык та буш; мәгәр үгезләр көченнән күп табыш алып буладыр.

⁵Иманы нык шаһит ялган сөйләмәс, ә ялганчы шаһитның телендә алдашу күп булыр.

⁶Тәкәббер кеше, зирәклек эстәсә дә, аңа ирешмәс, ә аңлы кеше өчен белем алу җиңелдер.

⁷Ахмак кешедән читләш, чөнки аның авызыннан акыллы сүз ишетмәссең.

⁸Акыллы кешенең зирәклеге — аның үз юлын аңлавында; аңсызларның ахмаклыгы исә — аларның ялгыш фикердә булуында.

⁹Ахмаклар гөнаһка көлеп карар, ә гадел кешеләр Раббының илтифатын казаныр.

¹⁰Йөрәк үзенең әрнүен үзе генә белер, һәм ул үзенең шатлыгын да читләр белән уртаклашмас.

¹¹Явызларның йорты бөләчәк, ә гаделләрнең торагы чәчәк атачак.

¹²Юлның кайберсе кешегә туры булып тоелырга да мөмкин, әмма аның ахыры — үлемдер.

¹³Шатланып көлгән чакта да, йөрәк сыкрарга мөмкин, һәм шатлыкның да ахыры кайгыга әйләнүе ихтимал.

¹⁴Күңеле азгын кеше — үзенең бозык юлыннан, ә игелекле кеше үзенең игелегеннән туенып яшәр.

¹⁵Аңсыз кеше һәр ишеткән сүзгә ышаныр, акыллы кеше исә юлындагы һәр адымын уйлап-үлчәп атлар.

¹⁶Зирәк кеше яманлыктан курка һәм аңардан кача, ахмак кешегә исә дуамаллык һәм мин-минлек хас.

¹⁷Дуамал кеше ахмаклык эшләр; нияте бозык кешегә нәфрәт белән карарлар.

¹⁸Томана кеше ахмаклыкны мирас итәр, аңлы кеше исә үзенә гыйлем таҗы казаныр.

¹⁹Игелексез кешеләр — игелеклеләр алдында, ә гаделсезләр тәкъва кешенең капкасы каршында баш иярләр.

²⁰Фәкыйрь кешене хәтта кардәш-якыннары да чит күрер, ә байның дуслары күп булыр.

²¹Үз якынын дошман күргән кеше гөнаһ эшли; ә кем фәкыйрьләргә миһербанлы, ул — бәхетле.

²²Явыз ниятле кешеләр юлдан язмыйлармыни?! Әмма мәрхәмәт белән тугрылык фәкать игелекле кешеләргә генә хас.

²³Һәр хезмәтнең табышы була, ә сафсатадан зыян гына килә.

²⁴Зирәкләрнең таҗы — аларның байлыгы, ә наданнарның ахмаклыгына дәлил — шул ук ахмаклык.

²⁵Ышанычлы шаһит җаннарны коткарыр, ә ялган шаһит хыянәткә сәбәп булыр.

²⁶Өмет-ышанычның ныгы — Раббыдан курку һәм Аны хөрмәт итү; һәм Раббы — андый кешеләрнең балалары өчен дә сыену урыныдыр.

²⁷Раббыдан курку һәм Аны хөрмәт итү — үлем тозагыннан саклый торган тереклек чишмәседер.

²⁸Патшаның бөеклеге — аның халкы күп булуда; ә халкы аз булган хөкемдар харап булыр.

²⁹Сабыр кеше акылга бай булыр, ә дуамал кеше күп ахмаклыклар эшләр.

³⁰Күңел сабырлыгы — тәнгә сихәт, ә көнчелек сөякләрне черетә.

³¹Фәкыйрьне рәнҗетү аның Яратучысын хурлау белән бер; Раббысын хөрмәт иткән кеше исә мохтаҗларга мәрхәмәт күрсәтер.

³²Яман кеше үз явызлыклары өчен тиешле җәзасын алмый калмас, ә тәкъва кешенең, җан биргәндә дә, котылуга өмете сүнми.

³³Зирәклек акыл иясенең йөрәгендә яши, фәкать ахмак кешеләр йөрәгендә генә ул үзенең барлыгын сиздермичә тора.

³⁴Тәкъвалык халыкны югары күтәрә, ә гөнаһ — халык өчен хурлык.

³⁵Патша үзенең мәрхәмәтен акыллы колларына күрсәтә, ә ачуын үзен хурлаучы бәндәләренә каршы юнәлтә.