Read Изге Язма, 2015 Гыйбрәтле сүзләр 15 Bible Online

Гыйбрәтле сүзләр 15 - Изге Язма, 2015 bible

Гыйбрәтле сүзләр 15

¹Йомшак җавап ярсуны басар, мәсхәрәле сүз исә ачуны кузгатыр.

²Зирәкнең теле файдалы белем бирер, ә ахмакның теле бары ахмаклык чәчәр.

³Раббының күзе җитмәгән урын юк; Ул явызларны да, игелекле бәндәләрен дә күреп-күзәтеп торыр.

⁴Йомшак тел — тереклек агачы, әмма тотнаксыз тел рухны какшатыр.

⁵Ахмак угыл атасының үгет-нәсыйхәтенә игътибар бирмәс; мәгәр шелтә сүзләренә колак салу — акыллылык билгеседер.

⁶Тәкъваның өендә мул хәзинә булыр, ә яманның килерендә — таркаулык.

⁷Зирәкләрнең теле гыйлем тарата, ә ахмакның күңелендә гыйлемгә урын юк.

⁸Явыз кеше китергән корбан — Раббы алдында зур кабахәтлектер, ә гадел кешенең догасын Ул мәгъкуль күрер.

⁹Раббы яман кешенең юлына җирәнеп карый, ә тәкъвалык юлыннан йөрүчене үз күрә.

¹⁰Хак юлдан тайпылучы каты җәзасын алыр, шелтә сүзен кире кагучы исә һәлак булыр.

¹¹Үлеләр аймагы һәм һәлакәт урыны Раббыга анык билгеле, әмма адәм балаларының күңелләрендә ни барын Ул бигрәк тә сизгер күзәтә.

¹²Азгын кеше үзен фаш итүчене яратмас һәм зирәк кеше янына якын бармас.

¹³Күңеле шатның йөзе дә нурлы, ә йөрәкнең әрнүе рухны какшата.

¹⁴Аңлы кешенең йөрәге белем эзләр, ахмак кеше исә ахмаклыгы белән туеныр.

¹⁵Бәхетсез кешенең көннәре тоташ сагышлы булыр, ә күңеле шат кеше һәрвакыт кәеф-сафа кылып яшәр.

¹⁶Раббыга сыенган хәлдә азга шөкер кылып яшәү зур хәзинә иясенең кайгы-шөбһә тулы тормышыннан яхшырак.

¹⁷Яшел азыкка канәгать булып дуслыкта яшәү симез үгез ите ашап дошманлыкта яшәүдән яхшырак.

¹⁸Кызу кешедән низаг чыгар, сабыр кешедән ызгыш тукталыр.

¹⁹Ялкауның йөрер юлын чәнечкеле үлән баскан, ә гадел кешенең юлы тигез-шомадыр.

²⁰Зирәк угыл атасын шатландырыр, ә акылсыз угыл анасын санга сукмас.

²¹Зиһенсез кеше өчен ахмаклык — сөенеч, ә акыллы кеше туры юлдан йөрер.

²²Киңәшсез эш таркалыр, ә киңәш күп җирдә эш ахырына җиткерелер.

²³Шатлыкка сәбәп — кешенең гадел җавабында; сүзнең вакытында әйтелгәне яхшы.

²⁴Зирәк кешенең гомер юлы үлеләр йортыннан котылу тарафына — югарыга таба юнәлгән.

²⁵Раббы тәкәббернең йортын бөлгенлеккә төшерер, ә тол хатынның ызанын ныгытыр.

²⁶Явызларның усал ниятләре — Раббы алдында зур кабахәтлек, ә хак сүзләрне Ул мәгъкуль күрә.

²⁷Комсыз бәндә үзенең йортын бәлагә салыр, ә ришвәтне күрәлмаучы кеше имин яшәр.

²⁸Тәкъва кеше әйтер сүзен төптән уйлар, ә яман кеше авызыннан явызлык чәчәр.

²⁹Раббы яманнардан ерак торыр, ә тәкъва бәндәләренең догасын ишетер.

³⁰Нурлы күз карашы йөрәкне җылытыр, яхшы хәбәр сөякләрне ныгытыр.

³¹Тормыш гыйлеменә игътибарлы колак зирәкләр арасында булыр.

³²Үгет-нәсыйхәтне кире кагучы үзенең җанын рәнҗетә, ә шелтә сүзенә колак салучы акыл җыя.

³³Раббыдан курку һәм Аны хөрмәт итү зирәклекне арттырыр, ә күндәм-тыйнак булу дан-хөрмәткә юл ачар.