Read Изге Язма, 2015 Гыйбрәтле сүзләр 16 Bible Online

Гыйбрәтле сүзләр 16 - Изге Язма, 2015 bible

Гыйбрәтле сүзләр 16

¹Кеше үзенең ниятен күңеленнән фараз итә, әмма соңгы сүзне Раббы әйтә.

²Кеше үзенең барлык юлларын пакь дип уйлый, әмма Раббы бәндәләренең ниятләрен үлчәп-күзәтеп тора.

³Эшләреңне Раббы иркенә тапшырсаң, ниятләрең гамәлгә ашыр.

⁴Раббы һәр нәрсәне Үз максаты өчен яратты, бәла-каза көненә кадәр Ул хәтта яман кешене дә саклар.

⁵Күңеле тәкәббер кеше Раббы алдында кабахәт саналыр; һичшиксез, ул кеше җәзасыз калмас.

⁶Мәрхәмәт вә тугрылык белән кеше үзенең гөнаһына ярлыкау табар, Раббыдан куркуы һәм Аңа хөрмәте белән явыз гамәлләрдән сакланыр.

⁷Кешенең юлы Раббыга мәгъкуль булса, Раббы аны дошманнары белән дә татулаштырыр.

⁸Гадел юл белән табылган аз гына нәрсә дә нахак юл белән табылган күп малдан яхшырак.

⁹Барыр юлын кеше үзе билгели, әмма адымнарының юнәлеше — Раббы ихтыярында.

¹⁰Патшаның авызында — илһамлы сүз; хөкемдә аның авызыннан хата сүз сөйләнмәс.

¹¹Дөрес көйләнгән бизмән һәм үлчәү тәлинкәләре — Раббыдан; үлчәүнең барлык герләре дә Аның хөкемендәдер.

¹²Явыз гамәл — патша өчен җирәнгечтер, чөнки тәхет бары гаделлек белән генә ныгытыла.

¹³Патшага тәкъва сүз кадерле, ул дөресен сөйләгәнне ярата.

¹⁴Патша күңелендәге ачу — үлемгә хәбәр; әмма зирәк кеше патшаның да мәрхәмәт-шәфкатен яулый алыр.

¹⁵Патшаның нурлы күз карашы тормыш вәгъдә итә; аның илтифаты яз көнендәге беренче яңгыр болыты кебек.

¹⁶Зирәклек казану алтынга ия булудан яхшырак; белем казану саф көмештән кыйммәтрәк.

¹⁷Гаделләрнең юлы — явызлыктан читкә тайпылу; пакь юлына тугры калган кеше үзенең җанын саклар.

¹⁸Горурлык — һәлакәткә, масаю хурлыкка илтә.

¹⁹Тыйнак рухлы фәкыйрьләр белән аралашу тәкәбберләр белән табыш бүлешүдән яхшырак.

²⁰Нәсыйхәтне тыңлап гамәл кылучы игелек табар; Раббыга таянучы бәхеткә ирешер.

²¹Күңеле сизгер кеше акыллы дип аталыр; сүзе ягымлы кеше гыйлемен арттырыр.

²²Зиһене бар кеше өчен акыл — тормыш чишмәсе; ә зиһене юкларның җәзасы — ахмаклык.

²³Зирәк акыллының теле дә зирәк булыр һәм аның белемен арттыруга хезмәт итәр.

²⁴Яхшы сүз кәрәзле бал кебек: җан өчен татлы һәм сөякләр өчен шифалы.

²⁵Юлның кайберсе кешегә туры булып тоелырга да мөмкин, әмма аның ахыры — үлемдер.

²⁶Хезмәт кешесе үзе өчен эшли, чөнки эшләргә аны карыны мәҗбүр итә.

²⁷Хәйләкәр кешенең күңелендә — явыз ният һәм мәкер, авызында исә чәчрәп-чәчрәп янган уттай зәһәр сүз булыр.

²⁸Мәкерле кеше гауга чыгарыр, әләкче кеше дуслар арасын бозар.

²⁹Яман кеше үзенең якынын аздырып бозык юлга этәрер,

³⁰күзләрен уйнатып мәкерләр корыр, иреннәрен тешләп явыз гамәлләрен эшләр.

³¹Агарган чәч — кешенең туры юлда казанып алган шөһрәтле таҗы.

³²Сабыр кеше баһадирдан кадерлерәк, нәфесенә хуҗа булган кеше шәһәр яулап алучыдан өстенрәк.

³³Итәккә жирәбә салып язмышны юрыйлар, әмма кешенең бөтен язмышы — Раббы хөкемендәдер.