Read Изге Язма, 2015 Гыйбрәтле сүзләр 17 Bible Online

Гыйбрәтле сүзләр 17 - Изге Язма, 2015 bible

Гыйбрәтле сүзләр 17

¹Ите-мае җитеш, мул, әмма талаш-гаугасы күп булган тормышка караганда бер кисәк каткан икмәкле, әмма имин-тыныч тормыш күпкә хәерлерәк.

²Акыллы кол-хезмәтче хуҗа кешенең юлдан язган углыннан өстен булыр һәм мирастан да хуҗаның угыллары белән беррәттән өлеш алыр.

³Көмеш эретү өчен — кызу мич, алтын эретү өчен утлы учак кирәк, ә кешеләрнең күңел сафлыклары Раббы тарафыннан сынала.

⁴Яман кеше явызлар сүзенә колак салыр; ялганчы кеше юлдан язганнарның сүзен тыңлар.

⁵Фәкыйрьне тиргәүче аның Яратучысын да хурлый; башка берәүнең бәхетсезлегенә шатланучы кеше җәзасын алмый калмас.

⁶Картларның таҗы — оныклар, ә балаларның даны — ата-анадыр.

⁷Ахмак кешегә — акыллы сүз, ә хөрмәт иясенә ялган сүз килешмәс.

⁸Ришвәт — аны бирүче кеше өчен кыйммәтле ташка бәрабәр; ришвәт белән һәрнәрсәгә ирешеп була, дип уйлый ул.

⁹Үпкә-кинә тотмаган кешенең дуслары күп булыр, ә ачу саклаган бәндә дусларын югалтыр.

¹⁰Акыллы кешегә бер шелтә сүзе дә уңай тәэсир ясар, акылсыз кешене исә йөз мәртәбә суктырсаң да файдасы булмас.

¹¹Явыз кешенең бөтен эстәгәне — фетнә, шуңа күрә аңа каршы илченең дә иң аяусызы җибәреләчәк.

¹²Ахмак уйлы томана белән очрашуга караганда балаларыннан мәхрүм калган ана аю белән очрашу хәерлерәк.

¹³Яхшылыкка яманлык иткәннең өеннән яманлык китмәс.

¹⁴Җәнҗалның башлануы су ташкыны кебек: аны, зураеп киткәнче, вакытында туктату зарур.

¹⁵Гаеплене аклау һәм гаепсезне гаепләү — икесе дә Раббы алдында зур кабахәтлектер.

¹⁶Акыл җыю өчен, ахмакка кулындагы акча ярдәм итмәс, акыл тупларга аның барыбер зиһене юк.

¹⁷Чын дусның дуслыгы беркайчан сүрелмәс; туган туганга ярдәм итәр өчен дөньяга килер.

¹⁸Ярдәм кулы сузмакчы булып, икенче берәү өчен җаваплылыкны үз өстенә алган кеше — акылсыздыр.

¹⁹Низагка һәвәс кеше гөнаһка да һәвәс; үз-үзен югары куеп мактанган тәкәббер үзенә һәлакәт эзли.

²⁰Мәкерле йөрәк игелек тапмас; ялган телле бәндә бәлагә юлыгыр.

²¹Акылсыз угылның атасы үз башына кайгы алыр, ахмак угылның атасы куаныч тапмас.

²²Шат-хозур күңел — тәнгә сихәт, ә сагышлы йөрәк сөякләрне корыта.

²³Явыз кеше, гаделлек юлын бозар өчен, куеныннан ришвәт чыгарыр.

²⁴Акыллының күз алдында — зирәклек үзе, ә ахмакның күз карашы дөнья читенә юнәлгән.

²⁵Акылсыз угыл үзенең атасына — гарьлек, анасына кайгы китерер.

²⁶Гаепсез кешене гаепләү һәм туры сүзе өчен хөрмәт иясен кыйнау һич килешмәс.

²⁷Акыллы кеше сүздә — тыйнак, гамәлендә сабыр-тыныч булыр.

²⁸Авызын йомып эндәшмичә утырса, ахмак та акыллы булып күренергә мөмкин.