Read Изге Язма, 2015 Гыйбрәтле сүзләр 18 Bible Online

Гыйбрәтле сүзләр 18 - Изге Язма, 2015 bible

Гыйбрәтле сүзләр 18

¹Үзбелдекле кеше үзенә генә кирәкне эзли һәм һәр акыллы гамәлгә каршы чыга.

²Ахмак кеше белемне яратмас, әмма үзен акыллы итеп күрсәтергә тырышыр.

³Яманга ияреп — хурлыгы, оятсызга ияреп, гарьлеге дә килә.

⁴Кеше теленнән түгелгән сүзләр тирән су кебек; зирәклек чыганагы ташкын суга охшаш.

⁵Гаепсезне хаксызга гаепләп, гаеплене аклап маташу — җинаятьтер.

⁶Акылсызның сүзләре җәнҗал куптарыр һәм кыйналуга сәбәп булыр.

⁷Ахмакның теле — үзе өчен һәлакәт, ә җаны өчен — тозак.

⁸Гайбәтченең сүзләре татлы ризык кебек, алар карынның иң тирән урыннарына үтеп керәләр.

⁹Эшендә ялкау — афәтченең кардәшедер.

¹⁰Раббының исеме — биек ныгытма-манара ул: тәкъва кеше, аның эченә кереп, хәвефтән котыла.

¹¹Байның милке — куәтле шәһәрдер: хуҗасы хыялында ул биек ихаталы кальга булып күренә.

¹²Егылыр алдыннан кешенең күңеле тәкәбберләнер, ә күндәм-тыйнак булу дан-хөрмәткә юл ачар.

¹³Кеше сүзен тыңлап бетермичә җавап әйткән — ахмак, һәм хурлыгы да аның үзенә булыр.

¹⁴Рухи ныклык кешенең хасталыгын да җиңә; ә рух какшаса, аны кем ныгыта алыр?!

¹⁵Аңлы кеше колагы белән белем эзләр һәм йөрәге белән акыл туплар.

¹⁶Биргән бүләк кешегә киң мәйдан ача, ул аны бөекләр дәрәҗәсенә күтәрә.

¹⁷Хөкемдә беренче сөйләүче үзенең дәгъвасында хаклы кебек күренсә дә, көндәше, килеп, аның дәлилләрен җимерер.

¹⁸Көчле дәгъвачылар арасында бәхәсне жирәбә туктата һәм хәл итә.

¹⁹Ачуы кабарган кардәшең шәһәр-ныгытмадан да көчлерәктер: бәхәстә аны җиңеп булмый.

²⁰Кешенең карыны үз авызының җимешләре белән тулы: ул үзе әйткән сүзләр белән туена.

²¹Үлем һәм яшәү — тел хакимлегендә; телгә осталар аның җимешләрен ашарлар.

²²Хатын тапкан ир бәхетен дә табар һәм Раббысының илтифатын казаныр.

²³Ярлы кеше ялварып сөйләр, ә бай кешенең җавабы тупас булыр.

²⁴Дусларның күп булуы яхшыга илтми; дусның кайберсе бертуганыңа караганда да якынрак һәм кадерлерәк була.