Read Изге Язма, 2015 Гыйбрәтле сүзләр 19 Bible Online

Гыйбрәтле сүзләр 19 - Изге Язма, 2015 bible

Гыйбрәтле сүзләр 19

¹Ялган телле һәм өстәвенә акылы сай кешедән күңеле саф булган ярлы кеше күпкә яхшырак.

²Белемсез кеше үз җанында бушлык тояр һәм ашыгып атлаган юлында абыныр.

³Ахмаклыгы кешене юлдан яздырыр һәм аның күңелендә Раббысына карата ачу хисе кузгатыр.

⁴Байлык дусларны ишәйтер, ә ярлыны бердәнбер дусты да ташлап китәр.

⁵Ялган шаһит һәм ялган сөйләүче җәзаларын алмыйча калмаслар.

⁶Түрәләр алдында күпләр ялагайланыр; һәм һәркайсы бүләк бирүчене үзенә дус санар.

⁷Ярлыны барлык туганнары чит күрер, аннан да бигрәк, дуслары ташлап китәр; ул, сөйләшеп аңлашыр өчен, аларны эзләп барса да, һич тота алмас.

⁸Акыл җыйган үзенең җанын да яратыр; акыл белән гамәл кылучы бәхет табар.

⁹Ялган шаһит һәм ялган сөйләүче җәзаларын алмыйча калмаслар.

¹⁰Ахмакка — бай-мул тормыш, кол кешегә аксөяк түрәләр өстеннән хакимлек килешмәс.

¹¹Акыллы кеше ачуы кабынып китүдән үзен тыя белер һәм бүтәннәрнең яман эшләренә карата мәрхәмәтле мөнәсәбәте белән үзенә ихтирам яулар.

¹²Патшаның ачуы арыслан үкерүенә бәрабәр, ә илтифаты үлән өстендәге чык кебек.

¹³Тинтәк угыл — атасы өчен бәла; ә мыгырдавык хатын берөзлексез тамчылап торган су кебек.

¹⁴Йорт-кура һәм хуҗалык — ата-анадан килгән мирас, ә акыллы хатын — Раббыдандыр.

¹⁵Ялкаулык кешене йокыга сабыштырыр, иренчәк җан исә үзен ачлыктан интектерер.

¹⁶Үгет-нәсыйхәтләрне үтәүче кеше үзенең җанын саклар, ә йөрер юлын кайгыртмаган кеше һәлак булыр.

¹⁷Фәкыйрьгә күрсәтелгән игелек Раббыга бирелгән бурыч кебек; Раббы исә Үзенең бурычын кайтармый калмый.

¹⁸Өмет бар чагында, углыңны шелтәлә, юкса аның һәлакәтенә сәбәпче булырсың.

¹⁹Дорфа бәндә тиешле җәзасын алсын: әгәр бер кызгансаң, аңа янә җәза бирергә тиеш булырсың.

²⁰Зирәк булыр өчен, хәзердән үк киңәшне тыңла һәм үгет-нәсыйхәтне кабул ит.

²¹Кеше күңелендә ният-максатлар күп булыр, әмма Раббы аларның Үзе ихтыяр иткәннәрен генә гамәлгә ашырыр.

²²Кешенең хыянәтсез булуы кадерледер; ярлы кеше ялганчыга караганда күпкә яхшырак.

²³Раббыдан курку һәм Аны хөрмәт итү кешене тормыш юлына бастыра; Раббыдан курыккан һәм Аны хөрмәт иткән кеше үзен канәгать һәм хәвефсез тояр; аңа бернинди явызлык та кагыла алмас.

²⁴Ялкау кеше тустаганны кулына алыр, әмма аны авызына китерергә иренер.

²⁵Мәсхәрәләүчене җәзага тартсаң, гади кешегә дә акыл керер; акыллыны шелтәләсәң, үгет-нәсыйхәтне үзләштерер.

²⁶Атасын бөлдерүче һәм анасын өйдән куып чыгаручы угыл — оятсыз һәм хурлыклы бәндәдер.

²⁷И углым, нәсыйхәттән читкә тайпылсаң, белем бирүче сүзләрдән мәхрүм булырсың.

²⁸Ялган шаһит гадел хөкемне мыскыл итә; яман кешеләр бозыклыкны йота бара.

²⁹Мәсхәрәләүчеләр өчен — аяусыз хөкем буласын, ахмакларның сыртларына таяк төшәсен онытмагыз.