Read Изге Язма, 2015 Гыйбрәтле сүзләр 2 Bible Online

Гыйбрәтле сүзләр 2 - Изге Язма, 2015 bible

Гыйбрәтле сүзләр 2

¹ 1-2 Углым! Әгәр син, зирәклекне үз күреп һәм күңелеңне фикер йөртүгә баглап, минем сүзләремне кабул итсәң һәм боерыкларымны хәтереңдә сакласаң,

³гыйлемлеккә таба йөз тотып, үзеңә акыл эстәсәң,

⁴аны мәгъдәннән [2] көмеш эзләгән кебек, хәзинә эзләгән кебек тырышып эзләсәң,

⁵син Раббыдан курку һәм Аны хөрмәт итүнең мәгънәсен аңларсың һәм Аллаһының асылына төшенерсең.

⁶Чөнки зирәклекне бәндәсенә Раббы Үзе күндерә; гыйлемлек һәм акыл Аның теленнән төшә.

⁷Раббы — күңеле саф адәмнәр өчен котылу, туры юлда булганнар өчен калкан.

⁸Гадел бәндәләренең сукмакларын һәм тугры кешеләренең юлларын саклый Ул.

⁹Шул чагында син тәкъвалык, гаделлек, намуслылык һәм һәртөрле игелекле юлның мәгънәсен аңларсың.

¹⁰Зирәклек синең йөрәгеңә кереп урнашкач һәм гыйлемлек синең җаныңны биләп алгач,

¹¹төплелек вә гакыл сине саклап торучылар булыр.

¹²Алар сине явызлык юлына төшүдән, ялган сөйләүчеләр коткысыннан,

¹³туры юлдан тайпылып, караңгылык сукмагына аяк басучылардан,

¹⁴эшләгән явызлыкларына куанучы, кылган азгынлыкларына сокланучы бәндәләрдән саклап торыр.

¹⁵Гөнаһ кылучыларның сукмагы кәкре, алар шул кәкре сукмакларында адашып йөриләр.

¹⁶ 16-17 Аллаһы иңдергән зирәклек белән акылыңа таянсаң, яшьлегендә ирен ташлап киткән, Раббысына антын оныткан чит хатынның юмакай тел белән күңелеңне йомшартырга тырышуына син һичкайчан алданмассың.

¹⁸Юкса андый хатынның өе — әҗәлгә, йөргән юлы үлеләр аймагына илтә.

¹⁹Аның янына кергән кире чыкмый һәм тормыш юлына бүтән аяк басмый.

²⁰Шуңа күрә йөргән юлың яхшы кешеләр юлы булсын, аягың тәкъвалар сукмагыннан читкә тайпылмасын.

²¹Чөнки күңеле саф адәмнәр, туры юлда булганнар гына илдә яшәр.

²²Ә яманнар юк ителер, гөнаһ юлындагылар илдән куылыр.