Read Изге Язма, 2015 Гыйбрәтле сүзләр 20 Bible Online

Гыйбрәтле сүзләр 20 - Изге Язма, 2015 bible

Гыйбрәтле сүзләр 20

¹Шәраб мәсхәрәгә калдыра, каты эчемлек дуамалландыра; алар белән мавыгучы һәркем акылсыз.

²Патшаның дәһшәте арыслан үкерүенә тиң; аны ярсытучы үзен хәвефле хәлгә куя.

³Гаугадан читләшүче кешегә хөрмәт тиеш; ә һәр ахмак гауга чыгарыр.

⁴Ялкау кирәк вакытында җир сөрмәс; урак вакытында эзләнер, әмма һичнәрсә тапмас.

⁵Кеше күңелендәге теләк-ниятләр тирән су кебек; акыллы кеше аларны чумырып-чумырып алыр.

⁶Күп кеше үзен: «Мин хыянәтсез!» — дип ышандырырга тырыша, әмма тугры кешене кем табар?!

⁷Тәкъва кеше гомере буе гөнаһсыз сукмактан барыр; үзеннән соң аның балалары да бәхетле булыр!

⁸Хөкем тәхетендә утыручы патша үзенең күз карашы белән бөтен явызлыкны куып таратыр.

⁹«Мин күңелемне пакьләдем, бар гөнаһымнан арындым», — дип кем әйтә алыр?!

¹⁰Ике ягы тигезсез үлчәү, алдагыч герләр — икесе дә Раббы алдында кабахәтлектер.

¹¹Эшләгән гамәленә карап, хәтта баланың да холкы сафмы, гаделме икәнен белеп була.

¹²Ишетүче колакны, күрүче күзне — икесен дә Раббы бар иткән.

¹³Фәкыйрь буласың килмәсә, йокыга салынма, тук буласың килсә, күзеңне ачык тот.

¹⁴Сатып алучы: «Бик кыйммәт, бик кыйммәт», — дип сатулашыр, ә сатып алгач: «Очсызга алдым!» — дип мактаныр.

¹⁵Алтын һәм күп төрле якут-асылташлар бар, әмма иң кыйммәтлесе — акыллы кеше авызыннан чыккан хак сүз.

¹⁶Чит-ят кеше өчен үз өстенә җаваплылык алучының киемен алаласың — аны үзеңдә рәһен [5] итеп калдырырга була.

¹⁷Нахак юл белән табылган икмәк кайбер кешегә тәмле тоелыр, әмма соңыннан аның авызы эре ком белән тулыр.

¹⁸Зур максатлар киңәш-мәслихәт белән ныгытыла; сугышка да киңәшләшмичә чыкма.

¹⁹Сүз йөртүче серне ачар; тишек авыз кеше белән аралашма.

²⁰Ата-анасына яман телләнүченең гомер шәме дөм караңгылык эчендә пыскып сүнәр.

²¹Җиңел килгән мирасның бәрәкәте булмас.

²²«Явызлык өчен тиешен кайтарырмын», — димә, бу эшне Раббыга тапшыр, Ул сине саклап калыр.

²³Алдагыч герләр — Раббы алдында зур кабахәтлектер; ялган үлчәүне Раббы хупламый.

²⁴Кешенең адымнары Раббы тарафыннан юнәлтелә; юкса кеше үзенең барасы юлын каян белсен?

²⁵Ашыгып нәзер әйтү һәм, нәзер әйткәннән соң, аның турында уй йөртү — кеше өчен тозак.

²⁶Зирәк патша яманнарны пыр туздырыр һәм алар өстенә җәза тәгәрмәчен җибәрер.

²⁷Кеше күңеленең бөтен төпкелләрен яктыртып сынаучы Раббы куйган шәм — кешенең рухыдыр.

²⁸Патшаны мәрхәмәте һәм тугрылыгы саклый, аның тәхетен дә гаделлеге тотып тора.

²⁹Көч-куәт — яшьләрнең даны, ә картларны бизәгән матурлык — чаларган баш.

³⁰Кыйналу яралары һәм җәрәхәтләр явызлыктан дәвалый, кешенең холык-фигылен төзәтә.