Read Изге Язма, 2015 Гыйбрәтле сүзләр 21 Bible Online

Гыйбрәтле сүзләр 21 - Изге Язма, 2015 bible

Гыйбрәтле сүзләр 21

¹Су ташкыннары кебек, патшаның күңел теләкләре дә Раббы ихтыярында: Ул аларны кая теләсә, шул тарафка юнәлтә.

²Кеше йөрәге сайлаган юл хак булып тоелырга мөмкин, әмма йөрәк омтылышларын Раббы Үзе үлчи.

³Раббы алдында тәкъвалык һәм гадел эш-гамәл корбан китерүдән мәгъкульрәк.

⁴Тәкәббер күз карашы һәм масаючан йөрәк яман кешегә хас, бу сыйфатлар гөнаһ саналадыр.

⁵Тырыш кешенең уе-нияте — муллык; ә ашык-пошык эшләүче мохтаҗлыкка дучар булыр.

⁶Ялган юл белән табылган мал томан кебек таралып китәр; андый кеше үзен үлемгә дучар итә.

⁷Яманнарның золым-җәбере аларның үз башына килер; чөнки алар гаделлек юлын кире кактылар.

⁸Бозык кешенең юлы — кәкре, ә күңеле саф кешенең эше намуслы булыр.

⁹Холыксыз хатын белән яшәүгә караганда түбәнең бер почмагында яшәү хәерлерәк.

¹⁰Бозык кешенең җаны явызлык тели; якын кешесе дә аның күзендә шәфкать нуры тапмас.

¹¹Мәсхәрәләүчегә җәза бирелгәндә, гади кеше үзен зирәк тояр, зирәккә акыллы сүз әйтелгәндә, ул белем җыяр.

¹²Аллаһы — тугры, Ул явызларның эш-гамәлен күреп-күзәтеп торыр һәм аларны бөлгенлеккә дучар итәр.

¹³Ярлының ялваруын ишетергә теләмичә, колагын томалаган ваемсызга үзе ярдәм сорап кычкырган чагында да җавап бирелмәс.

¹⁴Яшертен бүләк — ачуны, куенга кыстырылган ришвәт исә ярсуны сүрелдерер.

¹⁵Гадел хөкем — тәкъва кеше өчен куаныч, явызлык эшләүчеләр өчен — дәһшәт.

¹⁶Акыл юлыннан читкә тайпылган кеше үлеләр аймагыннан урын алыр.

¹⁷Кәеф-сафаны яратучы фәкыйрьләнер, ә шәраб һәм майлы ризык яратучыга байлык насыйп булмас.

¹⁸Яман бәндә — тәкъва кешенең, хыянәтче бәндә намуслы кешенең йолымыдыр.

¹⁹Холыксыз һәм дуамал хатын белән бергә яшәүгә караганда чүлдә яшәү хәерлерәк.

²⁰Зирәк кешенең өендә зиннәтле җиһаз-хәзинә һәм майлы сый булыр; ә ахмакның бар белгәне — байлыкны туздырудыр.

²¹Тәкъвалыкка вә тугрылыкка омтылучы кеше имин яшәр һәм кадер-хөрмәт казаныр.

²²Зирәк кеше теләсә нинди көчле сак астындагы шәһәргә дә үтеп керә һәм җимерелмәс дип уйланылган ныгытманы да җимерттерә алыр.

²³Авызын һәм телен тыйган үзенең җанын бәладән саклар.

²⁴Масаючан һәм тәкәббер кеше, исемен әйтсәк, денсез бәндә, һәр адымын-хәрәкәтен үзенең мин-минлегенә таянып эшләр.

²⁵ 25-26 Ач күзлелек ялкауны харап итәр, чөнки аның комсызлыгы көннән-көн арта, ә куллары эшләргә теләми; тәкъва кеше исә биргәнен кызганмый бирә.

²⁷Яман кешеләр китергән корбан, бигрәк тә явыз ният белән тәкъдим ителгәне — зур кабахәтлектер.

²⁸Ялган шаһит һәлак булыр; үз колагы белән ишеткәннәрне сөйләүченең сүзе дөрескә чыгар.

²⁹Яманның чыраенда усал масаю чагылыр, ә гадел кеше үзенең юлын нык тотар.

³⁰Раббының ихтыярыннан тыш зирәклек тә, акыл да, нәсыйхәт тә юк.

³¹Атны сугыш бәйгесенә алдан хәзерлиләр, әмма җиңү — Раббыдан.