Read Изге Язма, 2015 Гыйбрәтле сүзләр 22 Bible Online

Гыйбрәтле сүзләр 22 - Изге Язма, 2015 bible

Гыйбрәтле сүзләр 22

¹Абруйлы исем мал-мөлкәттән кадерлерәк, ихтирам казану көмеш һәм алтыннан кыйммәтрәк.

²Бай белән ярлының охшашлыгы шундадыр: бер-берсе белән очрашырлар; аларның икесен дә бер Раббы яраткан.

³Акыллы кеше, бәла-каза якынлашуын абайлап, читкә тайпылыр, тәҗрибәсез кеше исә, бәла эченә ташланып, михнәткә дучар булыр.

⁴Тыйнак булу, Раббыдан курку һәм Аны хөрмәт итүнең җимеше — байлык, хөрмәт һәм имин тормыш.

⁵Мәкерле кешене юлында чәнечкеле куак һәм тозаклар сагалап тора; үзенең иминлеген кайгырткан кеше андый юллардан ерак йөрсен.

⁶Балаңа барачак юлын яшьтән үк өйрәт, шулчак ул, картайгач та, бу юлдан читкә тайпылмас.

⁷Бай кеше ярлылар өстеннән хакимлек итәр, ә бурычлы кеше бурычка бирүченең колына әверелер.

⁸Ялган чәчкән кеше бәла урып алыр; һәм аның мәкер-ачу таягы сынар.

⁹Шәфкать иясе мөбарәк булыр, чөнки ул үз икмәгеннән фәкыйрьләргә дә өлеш чыгара.

¹⁰Денсезне яныңнан кусаң, гауга-җәнҗал бетәр, талаш-ызгыш, әдәпсезлекләр дә юкка чыгар.

¹¹Күңел сафлыгын саклаганның телендә гел ягымлы сүзләр булыр; андый кешене патша да үзенә дус санар.

¹²Раббы күзе белем-мәгърифәтне саклый, ә Канун бозучының сүзләрен Ул кире кага.

¹³Ялкау әйтер: «Тышта арыслан йөри, чыксам — ул мине ботарлап ташлар», — дияр.

¹⁴Чит хатынның авызы төпсез упкын кебек; Раббы ачуына дучар булганнар шунда егылып төшәрләр.

¹⁵Бала күңелендә акылсыз уйлар да булыр, әмма әдәпкә утырту чыбыгы аңардагы ахмаклыкны тиз куып чыгарыр.

¹⁶Байлыкны арттыру максаты белән ярлыны җәберләүче һәм байга ришвәт бирүчеләр ахырда үзләре дә фәкыйрьлеккә төшәрләр.

¹⁷Колак салып тыңла, зирәкләрнең сүзләренә игътибар ит, йөрәгең кыйбласын минем белем хәзинәмә таба бор.

¹⁸Чөнки мин өйрәткәннәр синең йөрәгеңдә сакланса һәм дә телеңә күчсә, бу сиңа зур юаныч булыр.

¹⁹Өмет-таянычың Раббыдан аерылмасын өчен, мин бүген сиңа үгет-нәсыйхәтләремне җиткерәм.

²⁰20-21 Ышанычлы-хак сүзләрне өйрәнеп, минем янга сине юллаучыларга син дөрес җавап бирсен өчен, мин сиңа утыз киңәш һәм үгет-нәсыйхәтемне язып күндердем түгелме?!

²²Болай да фәкыйрь булган ярлыны талама; хөкем алдында мохтаҗны кысма;

²³мәгәр аларның дәгъваларын Раббы Үзе хәл итәр, аларны талаучыларның җаннарын Раббы Үзе кисәр.

²⁴Күңелендә ачу саклаган кеше белән дуслашма, үчле кеше белән аралашма.

²⁵Юкса аларның гадәтләренә өйрәнүең һәм җаныңның тозакка эләгүе бар.

²⁶Ярдәм кулы сузмакчы булып, кеше бурычын үз өстеңә алма.

²⁷Юкса, түләр чамаң калмагач, ятып йоклый торган ястыгыңны да алып китәрләр.

²⁸Ата-бабаң күптән утыртып куйган ызан ташын күчермә.

²⁹Үз эшенең остасы булган кешене күргәнең бармы?! — Андый кеше гади кешеләргә түгел, патшаларга хезмәт итәр.