Read Изге Язма, 2015 Гыйбрәтле сүзләр 23 Bible Online

Гыйбрәтле сүзләр 23 - Изге Язма, 2015 bible

Гыйбрәтле сүзләр 23

¹Хөкемдар белән бергә табынга утырганда, алдыңдагы сыйга җентекле караш ташла.

²Бик ашыйсың килсә дә, нәфесеңне тыя бел.

³Табындагы тәмле ризыкларга сокланып комсызланма; мәгәр алар — алдаучан-авыр ризыклар.

⁴Байлык туплау хакында кайгыртма; зирәклегең андый уйларга юл бирмәсен.

⁵Байлыкка күз төшереп тә өлгермәссең, ул шундук юк булыр; байлык ул — канатлы нәрсә, бөркет кебек, күккә күтәрелеп оча да китә.

⁶Саран кешенең өендә ризык ашама, аның табынындагы тәмле ризыкларга алданып комсызланма.

⁷Чөнки саран кешенең күңелендә нәрсә булса, аның гамәлендә дә шул булыр; ул сиңа: «Аша һәм эч», — дигән булыр, әмма күңеле белән синең янда булмас.

⁸Син анда ашаган ризык кисәген кире чыгарырсың, әйткән яхшы сүзләрең заяга китәр.

⁹Ахмак кеше колагына сүзләреңне сөйләмә, чөнки ул синең акыллы сүзләреңне мыскыл гына итәр.

¹⁰Күптән утыртып куелган ызан ташын күчермә; ятимнәр җиренә басып кермә.

¹¹Чөнки аларның да Яклаучысы бар; Ул — кодрәтле, ятимнәрнең сиңа каршы дәгъваларын Ул Үзе тикшерер.

¹²Күңелеңне гыйлемгә беркет һәм колагыңны акыллы сүз тыңларга өйрәт.

¹³Баланың гаебен җәзасыз калдырма; чыбык белән җәзалаудан кеше үлми.

¹⁴Чыбык белән җәзалап, син аның җанын үлемнән коткарасың.

¹⁵Углым! Син зирәклеккә ирешсәң, минем күңелем дә шатлык кичерер.

¹⁶Синең авызың хакыйкать сүзләрен сөйләгәндә, мин дә бөтен җаным-тәнем белән сөенермен.

¹⁷Күңелең гөнаһлыларга кызыкмасын; Раббыдан курку һәм Аңа хөрмәт хисе гомер буе синең йөрәгеңдә саклансын.

¹⁸Шул чакны синең тормышың имин-мөбарәк булыр, өметләрең бушка китмәс.

¹⁹И углым, тыңла һәм зирәк бул, күңелеңне хак юлга юнәлдер.

²⁰Исергәнче шәраб эчүчеләр, шартлаганчы ит ашаучылар арасында булма,

²¹чөнки эчкече һәм бирән корсаклар бөлгенлеккә төшәр, йокы өянәге исә аларга сәләмә кием кидерер.

²²Атаң сүзен тыңла; ул сине бар иткән; анаңны картайган көннәрендә дә ярдәмеңнән мәхрүм итмә.

²³Хакыйкатьне сатып ал һәм аны кире сатма; зирәклек, гыйлем һәм акыл җый.

²⁴Ата өчен тәкъва угыл — зур шатлык, зирәк угыл — сөенеч.

²⁵Синең атаң белән анаң хозурланып бәйрәм итсен, анаң тантаналы шатлык кичерсен.

²⁶И углым! Йөрәгеңне миңа беркет, күзләрең минем юлны күзәтеп торсын.

²⁷Юкса фахишә хатын — тирән упкын ул, чит кеше хатыны — тар кое.

²⁸Фахишә хатын, юлбасар сыман, аулакта сагалап торыр һәм ирләр арасында хыянәтчеләр санын арттырыр.

²⁹Кемдә кайгы? Кемдә хәсрәт? Кемдә җәнҗал? Кемдә ыңгырашу? Кемдә сәбәпсез җәрәхәтләр? Кемдә зәһәрле кызыл күзләр? —

³⁰Озаклап шәраб янында хозурланып утыручыларда, тәмләткечләр салынган шәраб эзләп йөрүчеләрдә!

³¹Шәраб матур булып кызарып торса да, касә эчендә елык-елык җемелдәсә дә, эчкәндә, татлы тоелса да, аңа кызыгып алданма.

³²Ахырдан ул сине зәһәрле елан кебек, юха кебек чагар.

³³Синең күзләреңә сәер нәрсәләр күренер, күңелеңдә юньсез уйлар туар.

³⁴Һәм син үзеңне диңгез уртасындагы көймәнең озын колгасы башында йокыга талган бер кеше итеп хис итәрсең.

³⁵Аннары әйтерсең: «Мине кыйнадылар, әмма мин авырту сизмәдем; мине төрткәләделәр, әмма мин хәтерләмим. Уянгач, тагын шәраб эзләргә китәрмен», — диярсең.