Read Изге Язма, 2015 Гыйбрәтле сүзләр 24 Bible Online

Гыйбрәтле сүзләр 24 - Изге Язма, 2015 bible

Гыйбрәтле сүзләр 24

¹Яман кешеләрдән көнләшмә һәм алар белән аралашма.

²Чөнки аларның йөрәкләре фәкать золым-җәбер эзли, авызлары фәкать яманлык чәчә.

³Йорт зирәклек белән корылыр һәм акыл белән ныгытылыр.

⁴Һәм йортның эче дә һәртөрле кыйммәтле, гүзәл әйберләр белән осталарча җиһазланыр.

⁵Зирәк кеше кодрәтле булыр; акыллы кеше үзенең кодрәтен арттыра барыр.

⁶Шуңа күрә сугышыңны бөтен яктан уйлап, акыл белән алып бар; сугышның күп киңәшләр нигезендә алып барылганы уңыш китерә.

⁷Ахмак кеше өчен зирәклек артык югары; капка төбе җыеннарында ул авызын ачып сүз әйтә алмас.

⁸Явыз ниятле кеше азгын дип аталыр.

⁹Ахмакның нияте гөнаһ саналыр, ә башкаларны мыскыллаучыга җирәнеп карарлар.

¹⁰Әгәр син бәла-каза килгәндә хәлсезләнеп каласың икән, димәк, синең көч-кодрәтең аз.

¹¹Үлемгә дучар ителгәннәрне йолып ал, һәлакәт янаган ул гаепсезләрне коткарудан баш тартма.

¹²«Менә бит, без моны белмәдек!» — диярсеңме? Күңел сафлыгын Үлчәүче әллә моны белмиме?! Синең җаныңны Күзәтүче боларның һәммәсен белә; Ул һәр бәндәсенә гамәленә карап әҗерен бирер.

¹³Углым, бал аша, чөнки ул яхшы азык; бигрәк тә тамагың өчен татлы.

¹⁴Шуны бел: зирәклек тә синең җаның өчен шул бал кебек; зирәклек тапсаң, синең тормышың имин-мөбарәк булыр, синең өметең бушка китмәс.

¹⁵И явыз, син тәкъва кешенең торагына каршы мәкер корма; аның өен бөлгенлеккә төшермә.

¹⁶Чөнки тәкъва кеше, җиде мәртәбә егылса да, янә торып басар; явызлар исә егылган җирләрендәге афәттән һәлак булырлар.

¹⁷Дошманың егылганга сөенмә, ул абынганга, йөрәгең куанмасын.

¹⁸Югыйсә Раббы, сөенгәнеңне күреп, бу эшне Үзенә мәгъкуль санамас һәм синең дошманыңа булган Үзендәге ачуын тыеп калыр.

¹⁹Яманлык эшләүчеләрне күреп борчылма, намусы юк бәндәләрдән көнләшмә.

²⁰Чөнки яман кешенең киләчәге барыбер юк, намуссызларның гомер шәме барыбер сүнәчәк.

²¹И углым, Раббыдан һәм патшадан курык, фетнәчеләр белән аралашма,

²²чөнки Раббыдан да, патшадан да җәза көтмәгәндә килер — аларның һәр икесеннән киләчәк бәлане кем алдан белә алыр?!

²³Зирәкләр тагын болай дигәннәр: Хөкемдә монафикълык яхшы түгел.

²⁴Гаепле кешегә «син хаклы» диючене кавемнәр дошман күрерләр, халыклар аңа ләгънәт укырлар.

²⁵Ә гаеплене фаш итүчеләр мөбарәк-имин булыр; алар фатиха алыр, бәрәкәткә ирешер.

²⁶Гадел җавап үбешү кебек татлы булыр.

²⁷Әүвәл тыштагы эшләреңне башкар, кырдагыларын тәмамла; шуннан соң йортыңны кор.

²⁸Якыныңа каршы ялган шаһитлык итмә; алдашып сөйләмә.

²⁹«Ул миңа нәрсә эшләгән булса, мин дә аңа шуны ук эшлим, аның кылган эшенә муафыйк җавап бирәм», — димә.

³⁰Бервакыт мин ялкау һәм акылга сайрак бер кешенең иген басуы һәм йөзем бакчасы яныннан узып бара идем.

³¹Күрәм: иген басуын да, бакчаны да чәнечкеле куаклык басып киткән, җир өсте кычыткан белән капланган, бакчаның таш коймасы җимерелгән.

³²Бу хәлне күреп һәм күңелемнән кичереп, мин үземә сабак алдым:

³³«бераз йоклап алыйм, бераз черем итеп алыйм, кулларыма ял биреп ятып торыйм»

³⁴дигән арада, өеңә, карак кебек, ярлылык килеп керер, өстеңә, кораллы юлбасар кебек, мохтаҗлык ябырылыр.